Palacio de Arozteguiak Baztango Udal gobernuko tokiko
gobernu batzordeko bortz kideen kontra paratutako salaketa artxibatu du
Nafarroako Auzitegi Nagusiak. 2017ko ereiaroan Aroztegiako pelotazo
urbanistikoaren kontra Elizondoko plazan egin zen kanpaldiak mindurik, Elizondoko plaza herritarrei uzteagatik
prebarikazio eta diru publikoaren erabilera makurragatik salaketa paratu zigun
Palacio de Arozteguiak.
Lehendabizik Nafarroako Administrazio Auzitegirat jo zuten
eta helegitea aurkeztu, baina ez zieten kasurik egin. Hortaz, Auzitegi
Nagusirat jo zuten zigor alorreko salaketa hau paratuz nahiz, azkenean, epaileak
salaketa artxibatu duen. Hori bai, artxibatu baino lehen Iruñerat deklaratzerat
hirutan joan behar izan gara. Batean grabaketa sistemaren akatsarengatik,
bertzean akusazioa gaztigatu ez zutelako, azkenean urriaren 15ean deklaratu
ahal izan genuen artio.
Salaketa honen helburua argia da: gure izenak zikintzea eta
gu beldurraraztea. Palacio de Arozteguiak eztabaida soziala galdu du.
Herritarrek badakite proiektua Baztanen kalterako dela. Horregatik, gelditzen
zaien bidea inposizioaren da, eta hori PSISarekin eta salaketa judizialekin egiten dute.
Salaketa horiekin gainera herritar eta hautetsiak beldurrarazi nahi dituzte.
Ez dezagun ahantzi: oraingo hau Palacio de Arozteguiak
paratutako borzgarren salaketa judiziala da. Garbiñe Elizegi lehengo alkatearen
kontra bi, oraingo alkatearen eta zortzi herritarren aurka bertze bana eta,
azkenik, Elizondoko plazari buruzko hau. Hau erabateko ofentsiba judiziala da,
beren posizio ekonomikoa baliatuz, soberan duten aberastasuna aprobetxatuz
herritar eta hautetsi arruntak estu hartzeko.
Palacio de Arozteguiak Baztanen agindu nahi du. Beren
proiektua egin ahal izateko Baztango erakundeen gainetik PSIS erabiliz hasi
ziren, komunalak eta partikularren lurrak jabeen borondatearen kontra
Aroztegiako Banaketa eremuan sarraraziz eta bururik gabeko errekalifikazioak
eginez. Horrekin aski ez, eta orain, herrietako plaza publikoetan nork zer
egiten ahalko duen beraiek erabaki nahi dute. Beren proiektuarekin Baztanen
instalaturik direlarik, zer ez ote dute eginen?
Betiere, Baztango plazak eta Elizondokoa bereziki edozein
adierazpide eta agerpeneterako erabili izan dira, eta udalak plazaren
erabilerak desberdinak bereizketarik gabe baimendu ditu. Eta, bistan da, baimentzen segituko du.
Herritar guztierei espazio publikoa, argia, plater eta edalontzi
bererabilgarriak utzi zaizkie. Eta uzten segituko dugu. Gu hemen gauden artean,
bederen, herriko plazak herritarrendako izaten segituko dute.
Nolanahi ere, zigor-aretoko epaileak salaketa artxibaturik,
administraziorekiko auzi epaitegian plaza uztegatik Palacio de Arozteguiak
paratutako bertze helegite batek jarraitzen du.
Proiektuarekin aitzinerat segitzen dute, inposizioarekin eta
ofentsiba judizialarekin ere bai. Baina arrazoia guk dugu. Ez gaituzte menpean
hartuko.