BAZTAN KINTOKO DESAFEKTAZIOAREN AURKA


Atzo, 2012-01-02,  Baztango Batzar Nagusia bildu zen eta eguneko puntuen artean garrantzitsuenetakoa Kintoko herri-lurren edo komunalen desafektazioarena zen. Aldeko 17 bozkekin, aurkako 13rekin eta abstentzio batekin, urrian Batzar Nagusiak hartutako erabakia berrestea erabaki zen, hau da, komunalen desafektazioari ezetz erratea.

Urriko Batzar Nagusiko erabakiak zera aipatzen zuen: egitasmoa Aldude Mendi izeneko zainketa bereziko eremuan dagoela, Europako zuzentarauek babestua eta ez duela zentzurik horrelako toki batean halako egitasmoak egitea. Bertzalde, proiektua udalez gaindiko plan sektorial moduan tramitatzen ari direla, tokiko entitateen autonomia urratuz eta azkenik, gaia auzibideetan dagoela, Nafarroako Administrazioarekiko auzien epaitegian hain zuzen eta, horregatik, arinkeria litzatekeela inolako baimenik ematea.

Gaiaren inguruan Magnako langileen idatzia irakurri zen eta aitzineko erabakia ezeztatzeko galdegiten zuten UPN eta Ezkerraren proposamenak ere bai. Halaber, Erdiz Bizirik taldearen idatzi bat ere irakurri zen, ondotik, eztabaida eman eta bozketa eginez.

Batzarkideek salatu zutenez langileen idatzian batzarkideei buruzko errespetu falta handia zegoen baita harrokeria ere. Herrietako alkateak enpleguaren defentsan hiltegiari buruz edo “marmoles del Baztan”i buruz aunitz mugitu direla erantzun zieten langileei, eta ia beraiek, Magnako langileak non zeuden momentu horietan galdegin. Multinazionalek sustatutako egitasmo xehatzaileak gogor kritikatu zituzten, baita Nafarroako Gobernuak mendialdeari buruz izan duen bazterketa historikoa. Magnak aspalditik bazekiela bere jarduna akituko zela eta asti pila bat zeukala bere jarduna berrantolatzeko eta bertze produkzio lan batzuetan hasteko. Batzarkideak arras haserre agertu ziren langileen idatziaren tonu eta edukiaregantik. Bertzalde, lanpostuei buruz solasean hasita nekazarien lanpostuak ere aipatu zituzten, horrelako proiektuekin deseginen liratekeenak. Halaber urriko erabakia hartzeko Zubirirat eta Zilbetirat joan zirela eragile guztiekin solastatzerat eta alderdi guztien informazioa jaso ondotik erabakia hartu zutela.

Ezkerrako bi kideei aitzineko Batzar Nagusiko beraien jarrera zergatik aldatu zuten galdegin zieten; aipatzekoa da Florentino Goñik Ezkerrako zinegotziak erdaraz solastatatzeko egin zuen hautua. Ezkerrak bere jarrera aldaketaren berri eman zuen, beraien kontraesanak agerian utziz. Puntu horretan harrigarria da “ezkerreko” talde batek nola bat egin dezakeen eskuinarekin –UPN-rekin bere diskurtsoan, bertze behin Baztango Ezkerraren egiazko izaera agerian utziz. Zentzu horretan harrigarria da Ezkerraren parlamentuko taldea Zilbetiko basoen mozketagatik ingurugiro kontseilariaren agerraldia eskatzea parlamentuan, eta Baztangoak guzti honetan UPNrekin bat egitea.

Batzarrak bertzalde, aitzineko astean Diario de Noticiasek eta Diario de Navarrak errandako gezurrak eta egindako manipulazioak agerian uzteko balio izan zuen. Diario de Noticiasen aitzineko asteleheneko berriak UPNek eta Baztango Ezkerrak Elizondoko Herriari batzarra galdegin ziotela zekarren eta bi alderdiek hori ukatu zuten. Bertzalde, Diario de Navarrak aipatzen zuen herritar anonimoen eskariaren gibelen Baztango Ezkerra zegoela nabarmen gelditu zen.

Urriko erabakia berretsi ondotik, Magnak Kintoko lurrak desjabetzeko edo espropiatzeko tramiteak hasi zituela jakinarazi zen, eta horren aitzinean alegazioak aurkezteko erabakia hartu zen.