BAZTANGO UPNkoek EGINDAKO PRENTSA AGERRALDIARI ERANTZUNA


Baztango Udaleko Gobernu Taldeak (Bilduk eta Baztango Ezkerrak) komunikatu bat atera du baztango UPNk agerraldian errandakoari erantzunez.
Halaxe dio hitzez-hitz: 

UPNek egiten duen politika komunikabideetan titularrak bilatzea bertzerik ez da. Lehenik bilgarria prestatu eta ondotik bete. Poltroietatik, zesantietatik eta administrazio kontseiluetako dietetatik bizi direnen ohiko jokatzeko modua.

Erran bezala, lehenik titularra “etengabeko txapuza” eta alarma sortu; nahiz eta baztandarrek orain artio ikusi dutena udaletxe ireki, parte hartzailea, hurbila eta eraginkorra izan den. Nolanahi ere den, titularraren ondotik, estalkia betetzeko, epealdi luze bateko gisa eta garrantzi desberdineko gertakarien zerrenda; helburua: aitzinetik egindako irudi faltsu bat hedatzea.
Hasteko udalbatzarren aretoan egindako prentsa aitzineko agerraldiaren gaia. Udaletxe ireki batean inongo garrantzirik ez duen afera. Alta, UPNek udalbatzarrean erregearen, hau da Frankoren oinordekoaren, diru publikoen kontura bizi den horren argazkia egoteko egiten duen eginahala, UPNek udalari eta baztandarrei dien errespetua zein den argi erakusten du.
Bertzalde, udal idazkari posturako hizkuntz eskakizunen joan den ekaineko gaia. Dagoeneko solastatua, argitua eta konpondua dagoen gaia hain zuzen, nahiz eta akaso ez diren konturatu. Horrekin batean, udalak oharkabe euskara hutsez igorritako jakinarazpen baten kasua, zeinak, UPNrendako euskara errusieraren gisakoa dela jakiteko balio izan digun.UPNren ikusmolde kolonialista horrek euskaldunoi, hau da, Baztango gehiengoari zenbaterainoko ezinikusia diguten erakusten digu. Aipatzekoa da, halaber, UPNekoek euskaraz ez jakiteagatik udalak udalbatzarretarako eta batzordeetarako itzultzaile lanetarako duen gastu erantsia.
Batzorde informatiboen afera serioa da. Aldi jakin batzuetan udalbatzarraren aitzinetik egitea pasa izan zaigu; ezbairik gabe hori gure akatsa da eta gure asmoa hori zuzentzea eta udal jarduera hobetzea da.
Udal batzordeak murriztu direnaren inguruan, gaia eztabaidan dago eta Nafarroako Administrazio epaitegiak argitu beharko du. Udal gobernuak egin duena, eztabaida politikoa gutietsi gabe dietak aurreztea izan da. Orain artio, aldika puntu bakarra zuten edo lau minutu bertzerik irauten ez zuten batzorde informatiboetarat joateagatik zinegotzi bakoitzak 100 euro kobratzen zituen. Gure proposamena batzordeetan guttieneko lan-zama segurtatzeko izan da, horrela 100 euroko ordainketa hori errentabilizatzeko. Hirigintzako gaiak batzorde zabal horietan ukitzen dira eta Aroztegia eta Elizondoko 1. Banaketa Areari buruzko informazio zehatza nahi badute prentsan beharrean bertan galdegin beharko dute. Betiere, momentu honetan dozena bat batzorde ireki martxan daudela azpimarratu nahiko genuke eta horietan ehun herritar inguruk parte hartzen dutela. Batzorde horietan nahi duten herritarrek parte hartzen ahal dute eta udal informazioa emateaz gain, proposamenak eta eztabaidak izaten dira aldiro. Baina erran bezala, titularra, titularra da.
Akten kontuan gure borondatea gisakorik berriro ez errepikatzea da eta, horretarako, egin beharrekoak eginen ditugu. Nolanahi ere den, aipatzekoa da lehen aldia dela Baztango udala elebiz ari dela lanean eta horrek udal tekniko batzuendako lan bikoitza suposatzen duela. Horregatik Nafarroako Gobernuari aurrekontuetan aurkeztutako emendakin baten bidez itzulpen lanetarako laguntza eskatu diogu, baina ukatu egin digu; horrek, udalaren jardun arrunta zailtzen du.
Egindako akatsak guregain hartzen ditugu, nahiz eta ikusitakoak ikusita, bistan da UPNek “etengabeko txapuza” dela errateko erabili dituen argudioek ez dutela errealitatearekin bat egiten. Horrek erakusten duen bakarra UPNek, herritarren alde lanean ari den udaletxe herrikoi eta ireki honen aurka duen jarrera suntsikor eta erasokorra da. UPNek, aski modu axolagabean alarma faltsua sortzen saiatu da. Aise gehiago eta hobe eginen lukete titular handi-mandien partez, Gobernuarekin duten hari zuzena Baztanen alde erabiliko balute.