Ernesto Prat elizondorrarendako Ekineko ustezko kidea
izateagatik 8 urteko espetxe zigorra eskatu du fiskaltzak. Epaiketaren eguna
oraino finkatu ez badute ere, orain gutti, Ernestoren auzi berean zeuden
hainbat Euskal herritarren epaia atera da, erdiak libre eta bertze erdiak
zigortuz. Epaiketa Auzitegi Nazionalean eginen da. Egoera zertan den argitzeko,
Ernestorekin solastatu gara.
Zertan dago zure egoera prozesala?
Otsailean, Okzitaniatik entregatu nindutelarik,
prozesamendu-autoa komunikatu zidaten Auzitegi Nazionalean, eta eskaera
fiskalaren zain gelditu ginen, hori baita ohiko prozedura. Eskaera fiskala
orain dela hamar egun jakinarazi ziguten, eta horren ondotik bortz eguneko epea
izan dugu defentsa idatzia egiteko. Hau eginik, epaiketa eguna noiz aterako den
gelditzen da dena, edozein momentuan izan daitekeela eta hamabortz bat egun
lehenago jakinaraziko digutela.
Bizkitartean, baldintzapeko askatasunean nago 25.000
euroko fidantza ordaindu eta gero, astero Elizondoko bake-epaitegian sinatu
behar dudala eta estatu espainoletik ateratzeko debekua ezarri zaidala.
Zer eskatzen du fiskaltzak?
Fiskalak defenditzen du Baztango eskualdeko Ekin-eko
arduraduna naizela, eta hori frogatzeko gure etxeko miaketan lapurtutako
hainbat dokumentu aurkezten ditu, Baztango gazte asanblada edota Belaungo
errepidea zein Erdizen egin nahi zuten harrobiaren ingurukoak tarteko. Hortaz,
8 urteko espetxe zigorra eskatzen du, gehi inhabilitazio berezia 8
urtez eta erabateko inhabilitazioa 16 urtez.
Zu auzipetutako kasuko sententzia argitaratu da,
erdiak absolbitu dituzte eta bertze erdiak zigortu… ze balorazio egin daiteke?
Sententzia hori ezin da onartu, inondik inora. Batetik
talka egiten duelako euskal jendarteak gatazka politikoa gainditzeko dituen
gogoekin, eta talka egiten duelako ere Euskal Herrian ireki den ziklo politiko
berriarekin. Eta bertzetik, argi ikusten delako aurrez idatzitako sententzia
dela, ez baitira kontutan hartu epaiketan zehar egon ziren tortura
testigantzak, aurkeztutako probak edota polizia-etxean egindako grabaketak,
zeinetan epaileak berak ezarritako protokoloa ez den betetzen.
… Eta egoera hau guztia nola bizi duzu?
Sentsazio gazi-gozoa da. Gozoa ikusten delako egoera
berria sendotuz doala, eta euskal jendarteak itxaropenaz bizi duela egoera
berri hau, are gehiago lorpen ttiki batzuk izan ondotik, baina sentsazio gazia
da ere, Auzitegi Nazionala bezalako iraganeko tresna errepresiboek lanean
segitzen dutelako.
Ni ez naiz inor errateko bertzeei zer egin behar duten
beren herrian, baina Auzitegi Nazionaleko eraikina bikaina izanen litzateke
antzoki bat egiteko, edo zinema batzuk, edo kontzertu-aretoak, edo…