(H)ilbeltza betea Baztanen


hilbeltza 2020 bilaketarekin bat datozen irudiak
(H)ilbeltza Euskal Nobela Beltzaren Astea heldu da gurera, ilbeltzaren 20tik 26ra bitartean. Bertan, euskal lanen aurkezpenak, solasaldiak, errezitaldiak eta erakusketak jorratuko dituzte, aurten, seigarrenez.

Hala ere, egitasmoari hasiera Begoña Durrutyk eman dio 'Bereterretxeren Kanthoria' erakusketarekin, zeina  ilbeltzaren 13tik aitzin zabalik dagoen, ilbeltzaren 26ra bitartean, Arizkunenean.

Horace McCoy idazlearen 'Hobe nuen etxean gelditu' liburuari buruzko solasaldi bat jorratuko du astelehenean, urtarrilaren 20an, Fernando Rey itzultzaileak Iruritako Gure Kaiola elkartean, 19.00etatik aurrera.

Urtarrilaren 22an, Anizen jarraituko du egitarauak, bertako elkartean, 19.00etan, Amaia Elizaldek gidatuko duen 'Mirande beltza' izeneko hitzaldiaren bitartez.

Asteburuan ospatuko dira jarduera gehienak. Ortziralean, urtarrilaren 24an, 19.00etan, 'Quentin Tarantinoren mesanotxeko liburuak' izeneko mintzaldia izanen da Begoña del Tesoren eskutik,  Arizkunenean.

Halaber, larunbatean egun osoko egitarau oparoari helduko diote. Goizeko 11.00etan, Arizkunenean, 'Mundua Iturendik pasatu zenekoa' izenburupeko mahai inguru bat egingo dute eta bertan Jon Alonso, Maribi Elizalde eta Eneko Bidegainek esku hartuko dute.  Mahai inguruak oinarri hartuko du 1966. urteko egiazko gertaera bat: gorpu bat agertu zen; bi hilotz zeuden hilerrian; eta zabaldu zen Ben Barka [Marokoko politikari ezkertiarra, bahitua eta eraila] eta bere idazkaria ote ziren. Ben Barkak lotura du nobela beltzarekin eta Afrikako deskolonizazioarekin.

Arratsaldean, aldiz, Erratzura bertaratuko dira (H)ilbeltzazaleak eta bertako Etxelebert elkartean bazkari bat ospatuko dute. Bazkarira joan nahi duen edonork ilbeltzabaztanen@gmail.com helbide elektronikora idatzi dezake.

Bazkal ondoren, berriz, liburu aurkezpenen ordua izango da, elkarte berean. Batetik, Alfontso Gartziandiak 'Itsu kolpeka' lana aurkeztuko du. Bestetik, Josu Barambonesek, II. (H)ilbeltza bekaren irabazleak, 'Lardaska' izeneko obra emango du ezagutzera, Patricia Highsmithen 'The Blunderer' liburuaren itzulpena dena.

Arratsaldeko 18.00etan jolaserako unea izanen da, 'Susmagarrien gaua' hasiko bai da. Bertan parte-hartzen dutenak Erratzun barna ibiliko dirae, prestatu dituzten taldekako jolas beltzetan esku hartzen.
Azkenik, igandean izanen du amaiera Euskal Nobela Beltzaren Asteak. Goizean, 11.00etan, Amaiurren, Itzuli Beltza osatuko dute. 'Kontrabandisten Eleak izenburupean', Amaiurko txoko eta paraje desberdinetan barrena murgilduko dira bisitariak.

Finitzeko, 'Poesiaren Kriminalak' izeneko errezitaldiak itxiko du aurtengo jaialdia, Arizkunenean, arratsaldeko 19.00etan ere. Nobela beltza idatzi dutenen poesia batzuk aukeratu eta euskaratu dituzte antolatzaileek okasio honetarako.