Konfinatzeko aginduaren lehendabiziko bi
asteetan bailarako pertsona hauskorrenak laguntzeko neurri desberdinak bultzatu
ditu Baztango Udalak. Horrela, lehendabiziko momentutik, herrietako alkateekin
koordinaturik etxetako erosketa zerbitzua antolatu du, orain artio bederatzi
baztandarrek erabili dutena.
Herrietako alkateekin, halaber, etengabeko
kontaktua dago konfinamenduak herrietan dituen ondorio sozialak zein diren
jakiteko. Modu horretan, bertze behin, herrietako batzarretan oinarria duen
Baztango jatorrizko antolaketa aski erabilgarria gertatzen ari da larrialdi
egoeretarako. Betiere, erosketen zerbitzua nahi duenak aste egunez eta bulego
orduetan 948 580 006 telefonorat deitu beharko du eta gainerako egun eta
orduetan 641 872 821 telefonorat.
Bertzalde, gizarte zerbitzuek bakarrik bizi
diren 70 urtetik gorako adinekoak identifikatu dituzte eta 102 telefono dei
egin dituzte beren egoera zertan den jakiteko. Aipagarria da adineko horien telefonoak
eskuratzeko izaten ari diren zailtasunak. Gizarte zerbitzuetatik ere etxetako
otorduen zerbitzua indartu da, zahar etxeko sukaldearekin elkarlanean
eskaintzen dena. Halaber, beharrezko osasun neurriak hartuz eta udaleko
langileekin hilabetero egiten den elikagaien banaketa egin da, 53 familik
hartzen dute laguntza hau, egoera hauskorrean diren 154 pertsona.
Modu berean etxez etxeko zerbitzuak zerbitzu
horren beharrean diren jendeak artatzen segitzen du. Eta etxeetan adinekoak zaintzen
dituzten langileekin ere kontaktuan paratzeko lanean ari da udala, externa edo
interna gisa aritzen diren langile hauen egoera zein den jakiteko eta behar
izanez gero udaleko zerbitzuak eskaintzeko. Halaber indarkeria matxista eta
buruko eritasun kasuetarako arreta zerbitzua du udalak 948 580 006 eta 689 035
078 telefonoez bidez. Herritarrei egoera horiei buruz ardura hartzeko deia
egiten dien udalak.
Bailarako herritarrik ahulenak zaintzeko
hartutako neurrien ondotik, oraingo krisialdiari buruz neurri ekonomiko eta
fiskalak hartzen hasiko da Baztango Udala.