Nola heldu gara hona? Saguzarrek dute errua?
Batek daki,
zehatz-mehatz, hona nola heldu garen, baina bistan gelditu dira sistema honek
dituen ezgaitasun guztiak.
Gerran gaude?
Gerran batean
egotera bultzatzen gaituzte, bai norberarekiko gerra pertsonal batean, bai
besteekiko norgehiagokako gerra batean. Indibidualismora bultzatzen gaituen
sistema honentzat egoera bikaina bihurtu da hau, bakoitzak bere ongizatea lortu
dezan, gure buruan bakarrik pentsatzera bultzatzen gaitu, elkarlana alde batera
utziz.
Zein eragin izaten ari da pertsonalki?
Presioa eta
estresa. Ikasle naizen honetan, hezkuntza-sistemaren ezgaitasunak ere bistan
geratu direla salatu nahi dut. Edukia berdin-berdin barneratzera behartuak
gaude egoera honetan, hori aurrera eramateko baldintzak ditugun edo ez kontuan
hartu gabe.
Pandemia honek denoi berdin eragiten digu?
Argi dago ezetz.
Klase sozialak, adinak, generoak … zer esan handia daukate egoera honen aitzinean;
Dirudunek abantaila ugari dituzte bertzeengan, osasun zerbitzu pribatuak
adibidez. Adinekoen egoera adibidez penagarria da, eta ez gara arras urrun joan
behar hori hala dela ikusteko. Emakumeen kasuan aldiz, bortxaketen salaketa
kopurua nabarmen igo da, eta ez dira gutxiago isolamendu honetan erail dituzten
emakumeak: erasorik ez erantzunik gabe!
Jardun esentzialek, gehienek, emakume aurpegia dute. Zer
adierazten du horrek?
Jardun esentzial
gehienak oso feminizatuak daude eta ez dira bertzeak bezain baloratuak. Orain
ordea argi ikusi da bertzeak bezain garrantzitsuak direla, elkartasun osoa lan
hauek burutzen ari direnei!
Baztanen zer egoera uzten ari da pandemia?
Bertako denda ttikientzat
eta autonomoentzat sekulako gainbehera ekarri du egoera honek. Bertzalde,
kaleetan guardia zibil, foruzaingo zein militarren presentziak kontrol eta
beldurra areagotzea bertzerik ez du ekarri.
Baztanen nola egin aurre pandemiari?
Elkarlanean. Egoera
honetan inoiz baino garrantzitsuagoa da kolektiboki aritzea, elkar lagunduz
lortuko dugu egoera eramangarriagoa izatea., herriak bakarrik salba dezake
herria.
Gizarte hiperkonektatu baten aztarnak ugaritu dira.
Interneten topatuko al dugu elkar?
Baietz erranen
nuke, inkesta honen bitartez interneten topatu dugu elkar, eta antzekoa da dena
egoera honetan, pantaila bizirauteko tresna bihurtu da.
Egoera honen aurrean, borroka da …
Ezin bertzekoa.
Hasteko pertsonalki formatzeko egoera bikaina da, eta ahal den moduan, etxetik
bada ere borrokan jarraitu behar dugu. Hau akitzean inoiz baina indartsuago
atera beharko ginateke kalera!
Liburu baten irakurketa gomendatuko al zeniguke.
Zergatik?
Onartu beharra dut
irakurtzeko ohitura anitzik ez dutela, baina bada anitz gustatu zitzaidan
liburu bat: Piztiaren begiak.
Nobela beltza asko
gustatzen zait, sorrarazten dizun beldur puntu hori, beldurgarria baina
kitzikagarria. Liburu hau nobela beltza da, eta bertan kontatzen duen istorioa
oso interesgarria iruditu zitzaidan. Gizarte honetan dauden hainbat egoera
islatzen ditu, eta aldi berean puntu beltz hori du, irakurtzeari uztea uzten ez
dizun puntu hori.