(Argazkia: Juan Mari Ondikol).
Urtero
bezala Baztango Udalak bailararekin zerikusia duten ikasketa akaberako lanak
eta proiektuak diruz laguntzeko dirulaguntza deialdia egin du. Aurten proiektu
bakarra aurkeztu da deialdirat eta epaimahaiak ontako emanik, onuraduna Miguel
Sobrino Etulain arizkundarra izanen da,
historia graduko ikaslea EHUko Gasteizko Letren Fakultatean. Lana
aurkeztu ondotik 500 euroko saria jasoko du.
Sobrinok Baztango
kaparetasun unibertsalari buruzko lana eginen du. Lan horretan aztertuko du
XVIII. mendetik aitzinera bailarako
auzokide izateko irizpideak nola joan ziren zorrotuz; denborarekin kapareen
murrizketa etorri zen eta, ondorioz, abantaila horien nolabaiteko esklusibizazioa.
Aldi berean gatazka sozialak ere auzokideen eta biztanleen artean.
Ikerketa
egiteko bibliografiaren azterketa eta agiritegietako agiriak miatuko ditu.
Epaimahia
Lekaroz ikastetxeko eta Elizondoko lanbide heziketa ikastetxeko zuzendariek,
Baztango Cederna-Garalurreko teknikariak eta Baztango alkateak osatu dute.
2016an lehen
aldiz deialdia egin zenetik denera zortzi laguntza eman dira eta Baztanekin
zerikusia duten lan hauek egin dira: turismoa Baztanen, XVII-XVIII. mendeetako
goi-mailako etxeen tipologia,
mutil-dantzak eta emaztekien parte hartzea, Baztango haur eskolaren
proiektu pedagogikoa, Amaiurko euskararen berezitasunen azterketa, emakume etorkinen egoerari buruzko lana,
Baztango nekazaritza XVI. mendetik XVIII. menderat eta Baztango turismoa
iraunkorra al da? izenburuko lana.
Deialdiak
urtero 500 euroko lau dirulaguntza banatzen ditu gehienez.