Baztango Udala Oinherrirekin batera lantzen ari den egitasmoaren berri heldu zaigu Arranbelara, eta horren berri emanen dizuegu jarraian:
"Baztango Udalak eta Oinherri Herri Hezitzaileak sustatzeko elkarteak lankidetzan daramatzate hondar bi urteak. Baztanen Herri Hezitzaileen filosofiaren baitan, Kerizu beretik egitasmoan egindako lan eta dinamika desberdinen ondotik, gaia berrartzeko prozesua martxan paratu genuen pasa den astean. Fase berri honi ekiteko, hezkuntzaren arloa modu zabal batean landuko duen elkargunea osatzeari ekin diogu. Horretarako, Baztango eragile desberdinak elkartu ginen, herri hezitzailearen filosofiarekiko egun ditugun ahulgune eta indarguneak identifikatzeko helburuarekin. Bertan, Baztango ikastetxeak, udal ordezkari politiko zein teknikoak, hezkuntza ez formaleko eragileak, guraso elkarteak eta herrigintzako eragileak bildu ginen.
Heldu diren hilabetetan bertze bi saio egitea aurreikusten dugu: aitzinerat begira ditugun erronkak identifikatzeko eta, modu kolektibo batean erronka hauek landu ahal izateko egitura sortzeko. Saio hauek martxoaren 2an eta apirilaren 20an izanen dira. Behin elkargunea osatuta, berau sustatuko duen talde eragile bat egituratuz, Baztan herri hezitzailea egitasmoan sakontzeko helburuarekin.
Baztango herri hezitzailearen egitasmoa berraktibatzeko prozesuaren lehen saioa arrakastatsua izan zen (20 lagun inguru eta 10 eragile). Arlo desberdinetan lan egiten duten eragile aunitz hurbildu ziren eta elkarlanerako ilusio giro ederra sortu zen".