Prentsa agerraldi baten bidez zenbait baztandarrek salatu dute heldu den ortzegunean eginen den epaiketa jazarpen politiko eta poliziala dela, lekuz kanpo. Hauxe irakurri dute hitzez-hitz:
Baztango
lau gazte 2010eko Elizondoko ihauteetan torturak salatzen zituen parodia
egiteagatik irainengatik epaitu behar dituzte. Epaiketa heldu den ortzegunean
izanen da eta akusatuetako bakoitzarendako 5.400 euroko isuna eskatzen du
fiskaltzak.
Tortura
Espainiako estatuak Euskal Herriaren askatasunaren aldeko borroka eta disidentzia
politiko eta soziala geldiarazteko, herritarrak beldurrarazteko eta mugitu gabe
kontzeko tresna basati eta estrukturala izan da. Estrukturala Estatuko
instantzia desberdinak: gobernuak, politikariak, epaitegiak, poliziak,
legediak, sistemaren komunikabideak, politikariak elkarrekin aritu baitira giza
duintasunaren kontrako praktika basatia hau babesten eta gauzatzen, beraiek
eraikitako inpunitate markoak ahalbidetu du hamarkadetan zigorgabetasun osoz
iraun duen praktika mespretxagarria.
Milaka dira Euskal Herrian torturak jasan dituztela salatu dutenak,
hurbil-hurbilekoak ere bai, ez baitira gutti atxilotuak eta torturatuak izan direla
salatu duten baztandarrak eta eskualdeko herritarrak.
Errealitate
gaitz eta gordin horren aitzinean, salaketak izan diren kasu ia-ia guztietan
salaketa horiek artxibatu edo makurragoa dena, estatuak fiskaltzaren bidez
torturak jasan eta salaketa jarri dutenak salatu eta auzipetu ditu, horren adibide
mingarri bat Mattin Sarasola eta Igor Porttu lesakarrekin pasatu zena dugu.
Gauzak
horrela, Euskal Herrian torturak salatzeko ekimenak etengabe egin izan dira eta
Elizondon ihauteetan egin zena horietako bat bertzerik ez zen izan. Modu
horretan Baztango lau gazteen kontrako epaiketa estatuak tortura babesteko
eraikia duen egituraren parte gisa dela salatu nahi dugu eta ez dela inondik
ere onartzen ahal. Gainera, Euskal Herrian ireki den ziklo politiko berrian
jazarpen juridiko eta polizialak guztiz lekuz kanpo daude. Euskal Herriak
konponbide eta normalizaziorako bidea egitea hautatu badu ere, estatuak gerra
estratejian segitzen du, bitarteko errepresibo desberdinak martxan dituela. Egoera
gogor honetan gure herrikideei babesik eta elkartasunik beroenak eskaini nahi
dizkiegu. Aldi berean, estatuari bere errepresio estrategia geldiarazteko
eskatu eta torturarekin behin betiko akitzeko.
Modu
horretan, heldu den urriaren 4an egitekoa den epaiketarat joateko gonbitea egin
nahi diegu baztandarrei. Horretarako, eguerdiko 12etan Elizondoko plazan
hitzordua eginen dugu. Bertzalde, egun berean, Elizondoko plazan ilunabarreko
8etan epaiketa salatzeko elkarretaratzea egiteko deia egina genuen, baina gaur
goizean jakin dugunez Gobernuaren Nafarroako ordezkaritzak debekatu du,
Espainiako gobernuaren izaera antidemokratiko eta filofaxistaren bertze
adibidea. Ondoko egunean deialdi honekin zer eginen dugun publikoki
jakinaraziko dugu.
Kriminalizaziorik
ez. Torturik ez. Jazarpenik eta epaiketarik ez.