2017/02/22

SARA ETA IZAR ETXERAT: SINADURA BILKETA

Sara Majarenas presoa askatzeko kanpaina abiatu dute. Bere egoeraren salaketak indarra hartu zuen Izar alabari egindako erasoaren harira eta sinadura bilketa abiatu dute eskaera egiteko. hemen eskutitza.
Sinadura eman nahi baduzu honat igorri: izarrekin@gmail.com



MARTXOAREN 11an HAZIAREN EGUNA LEKAROZEN



2017/02/18

MINTZA TXOTX MARTXOAREN 11an


Eskualdeko Solaslagunak, Iruñerriko eta Lizarbeibarko Mintzakideak eta Baztan-Bidasoako Euskaltegiak antolatua, sagardotegiko bazkaria eginen dute martxoaren 11an.
Saio hau erabat parte-hartzailea izatea nahi dugu, gainera, harremanak lantzeko, euskal sareak hedatzeko eta gure inguruan eragin soziala izateko ere balioko du.

Izena emateko epea martxoaren 8a da.
Informazioa hemen

2017/02/17

NAFARROAKO TALDE BERRIA AURKEZTUKO DU SORTUK


IDAZLEEKIN SOLASEAN EKIMENEAN PARTE HARTZEKO DEIA

Ikasturte hontako azken liburua hautatu du IDAZLEEKIN SOLASEAN ekimenak. Aitziber Etxeberriaren Nomada liburuaren eskaera epea ireki dute hamar egunez. Hortarako aski da helbide hontarat mezu bat igortzea: idazleekinsolasean@gmail.com

Nomada:
Sobietar Batasuneko enbaxadore berriaren etorrerak Nikolay Zaitseven bizimodu lasaia hankaz gora ipini du eta Txotxongilo Antzokiko bere mundu txikitik aterarazi. Hasiera batean pasaportea berritzeko errutinazkoa behar zuen solasaldia, ustekabean denboran luzatzen eta korapilatzen joan den itaunketa sakona bilakatu da, iraganeko heriotza bat argitu nahian.
Intriga, espioitza konplotak eta gudaren oroitzapen oso gertukoak nahasten dituen ezohiko eleberri honetan, informazioa trebeziaz aletzen joango zaigu idazlea, Nikolay Zaitseven moduan, bera ere sekretu guztiak kolpetik ez azaltzeko ahaleginean. Hain zuzen ere, identifikatua eta kontrolatua izatea baita nomadaren egiazko beldurra.

2017/02/16

BIHAR KONTZERTUA ZUBIPUNTAN


EUSKALKIDE EGITASMOA MARTXAN: BERA ETA ELIZONDON MINTZAPRAKTIKAK

Urtero bezala ikasturtean zehar hainbat saio jarriko ditu martxan Solaslalaguna egitasmoak. Urteko lehenbizikoa hau izanen da: Euskalkide aldaera Elizondoko eta Berako zahar-etxeetan. Tokian tokiko mintzamolde jatorrak ikasteko eta horretan aritzeko espazioak sortu nahi ditu Baztan-Bortziriak-Malerrekako Solaslaguna egitasmotik abiatu den ekimenak.

Helburu zabalago batzuetan ere kokatua dago, hizkuntza portaeran eragitea, adinero pertsonekin hartuemanak sortzea eta ondare inmaterialaren eramaleak diren neurrian, hauen esperientzietaz ikastea, bertzeak bertze.

Bera
ko San Jose Zahar Etxean astean ordubetez elkartuko dira, eta zortzi saio eginen dituzte, martxoaren 4tik apirilaren 29ra bitarteko larunbatetan, 11:00etatik 12:00etara.
Elizondoko Francisco Joaquin Iriarte Zahar Etxean, berriz, hiru saio eginen dituzte otsailaren 10, 17 eta 24an, ortzirale arratsaldeko 5etatik 6etara.

Izen emateko 610 920673 telefonora deitu behar da (Oianko) edo solaslaguna@topagunea.org helbide elektronikoan.

"GAN-TORRI" PROGRAMAREN DIRULAGUNTZA GUTTITUZ JOAN DA

Baztango Udalak Gan-Torri programa antolatzen du urtero. Nafar Gobernuak diruz lagundutako programa da eta honen helburua kotxe istripuak saihestea da. Horretarako herrietako bestak ospatzen diren larunbatetan zein bertzelako ospakizunetan autobusa jartzen da, herriz herriko desplazamenduak –joan-etorriak- egiteko.

Gan-Torri programa, Baztango Udalean 2004 urtetik martxan dago, 12 urte hauetan 11.534 pertsonek erabili dute zerbitzu hau.

Zerbitzuaren erabiltzaile kopurua 14 urte hauetan mantenduz joan da. Bataz bertze, urtero 823 pertsonek erabili dute zerbitzu hau.

Nafarroako Gobernuak zerbitzua finantzatzeko diru-laguntza ematen du, hau, urtetik urtera gutxituz joan da. Lehenbiziko urteetan 4.000 euro inguruko diru-laguntza ematen zuten eta azkeneko urteetan 2.900 euroko laguntza bertzerik ez dute eman. 
Zerbitzuaren kostua gutxi gora behera 9.000 eurokoa da urte bakoitzeko, beraz, Nafarroako Gobernuko diru-laguntzak ordaintzen ez duena Baztango Udalak bere gain hartzen du.

Baztango herri guztietako bestetan eta Baztandarren Biltzarrean zerbitzua ematen da, hau da, 16 zerbitzu urtean. 

2017/02/14

IGANDEAN "FRANCOREN BILOBARI GUTUNA" ANTZESLANA IRURITAN

Iñakik hamar urte eta leuzemia ditu. Joxanek berrogeita sei urte eta gerra zibileko obus baten txatala buruan. Etorkizun bideragarririk ez duen ospitalean iragana eta oraina kateatzen dira Migel eta Kristina medikuen ametsetan.  Itxarongeletan sekula agertzen ez diren pazienteen izen zerrendak entzuten dira ordena alfabetikoan eta Carmen Martinez-Bordiuk betetzen du bihotzeko aldizkari maiztuaren azala.

Iraun beharraren gaitzak jotako komunitate baten hezurren eta gezurren erradiografia traumatologikoa da Francoren bilobari gutuna.

MILA EUROKO ISUNA AROZTEGIA PELOTAZOA DELA ERRATEAGATIK

Palacio de Arozteguia S.L. enpresaren kereila ontzat eman du epaile batek, Garbiñe Elizegi Baztango alkate ohiak enpresaren "ohorea iraindu" zuela erranez.
Berria hemen
Baztango EH Bilduk salatu du erabakia, fiskalak ohorearen kontrako aztarnarik ikusten ez zuen tokian.

Halaxe dio prentsa oharrak:

Gaur, Iruñeko epaitegiak Palacio de Arozteguia S.L enpresak Garbiñe Elizegi Narbarte Baztango alkate ohiaren aurka jarritako salaketaren inguruan emandako epaiaren berri izan dugu. Epai honen aitzinean hurrengoa adierazi nahi dugu:
  • Aroztegiako proiektua zilegitasun sozialik ez zuela lortzen ikusirik, Palacio de Arozteguia S.L. promotoreak, herritar eta arduradun politikoen aurka judizialki jotzeko erabakia hartu zuen aspaldi. Herritarrek ematen ez ziotena epaitegietako gelaz gelako ibilera tranpatiarekin lortuko zuelako esperantzan. Bide batez herritarren eta ordezkari politikoen proiektuaren aurkako ahotsak isilarazi nahian.
  • Epaiketa hau adierazpen askatasunaren aurkako eraso larria izan da eta are gehiago gaur argitaratutako epaia. Krisi ekonomiko, ekologiko eta sozialak eragiten dituzten jokaldi ekonomiko espekulatzaileak salatzeagatik zigortu nahi gaituzte. Hondamendira eramaten gaituztenak inpunitate osoarekin jokatzeko aurrekari ikaragarria da ordezkari politikoak herritarren borondatea defenditzeagatik eta pelotazo urbanistikoak salatzeagatik zigortzea.
  • Bereziki larria da fiskala bera enpresak jarritako demandaren kontra agertu zela (Garbiñe Elizegiri arrazoia emanez) eta hala ere epaileak enpresaren ustezko “ohorea” adierazpen askatasunaren aitzinetik jartzea. Lege berriek herritarren adierazpen eskubidea ihartzen dutenean, haratago joatea ezinezkoa zela zirudienean, berriz ere Nafarroako erregimenaren indarrek marka guztiak hautsi dituzte. Nola deitu behar diogu 530.000 euro inguru balio zuen lur batek ia 36 milioi inguruko balio izatera pasatu izana “pelotazo” ez bada?
  •  Bidegabekeri honen aitzinean, jakinarazi nahi dugu epai honen kontrako helegitea jarriko dugula eta oztopo guztien gainetik segituko dugula herritarren borondatea defenditzen. Inposizio, mehatxu eta isunek ez diote proiektu honi zilegitasunik ematen, guztiz kontrakoa. Modu berean, agerian uzten dituzte gisa honetako proiektuak defenditzen dituzten ordezkarien benetazko interesak eta eztabaida politikorako ezgaitasuna.




BRIGADAK 2017. IZENA EMATEKO AUKERA IREKIA

Izena emateko idatzi brigadak@askapena.org helbidera


2017/02/10

PREBENTZIO SAIOAK ANTOLATU DITUZTE GIZARTE ZERBITZUETATIK

Baztango Gizarte Zerbitzuek bi pebentzio saio antolatu dituzte. Izen-ematea beharrezkoa da udaltxera deituz 948 580 006 telefonora. 

ALERGIAK, INTOLERANTZIAK ETA ELIKADURA OSASUNTSUA
  • NOIZ: Otsailak 21, asteartea 10:00-11:00
  • NON: Arizkunenean
  • Hizlaria: Amaia Meoki Plaza (Dietista)

LEHEN SOROSPENAK (Gazteleraz)
  • NOIZ: Otsailak 24, ortzirala 10:00-11:30
  • NON: Elizondoko Osasun Etxea
  • Hizlariak: Osasun Etxeko Profesionalak 

2017/02/09

ELIZONDON FRUTA-ARBOLEN IKASTAROA EGIN BERRI DUTE


Larunbatean laugarren urtez segidan Baztango udalak antolatzen duen fruta-arbolak inausteko ikastaroa egin zen. Xabi Akizu irakaslearen gidaritzapean hamaika lagun  goiz eta atsaldez, zortzi orduz Elizondoko bi lurzatitan aritu ziren. Akizuk fruta-arbolei probetxu gehien ateratzeko teknikak erakutsi zizkien eta, horretarako, adar aunitz moztea baino, adarrak markutzea hobe dela azaldu zien. Sobera moztuz gero, zuhaitzak bere indarra adar berriak sortzeko ematen du, bertze gisa, fruituetarako. Bertzalde, inausten hasi aitzinean zuhaitza ongi aztertu behar dela erran zuen: lurra, gaitzak… eta, ondotik, lanean hasi, betiere ondoko urtea ere gogoan hartuz.

Ikastaro hau berriki aurkezturiko Baztango agroekologia eskola herritarraren baitan egin zen. Ondoko hitzordua, martxoaren 11an Lekarozen eginen den Bertako haziaren eguna izanen da, kasu horretan, Hazitik hozie eta Legate elkartearen eskutik.





LARUNBATEAN GIZAKUNDE


BAZTANGO ORDENANTZEI BURUZKO SOLASALDIA BIHAR

Baztango bailararen historiari buruzko solasaldi zikloa antolatu dute Kasino eta Museoko lagunak elkarteek
BAZTANGO ORDENANTZAK izanen da lehendabizikoa: Talde –lanaren antolakuntza, antzinako baztandarren landak, abereak eta basoak. 
Hizlaria: José María Imízcoz Beunza

  • NOIZ: Otsailaren 10a, 20:00etan
  • NON: Elizondoko Kasinoko ekitaldi aretoa 

Borondatezko sarrerak Xauli Elkartearen alde izanen dira 

2017/02/08

ELIZONDOKO DANBORRADAN PARTE HARTZEKO DEIALDIA

APUNTATZEKO EPEA: Otsailaren 16a 20:00ak arte
NON? Casino, Intza, Hiru eta Saioan

ORDAINKETAK (Izena ematerakoan):
Tanborra + pintxoak: 20€
Pintxoak bakarrik: 3€

ENTSAIOAK:

  • IGANDEA 19 12:00etan, Iriarte Pilotalekuan
  • ASTEAZKENA 22 19:30etan, Iriarte Pilotalekuan

TANBOR HARTZEA:

  • IGANDEA 19 11:30, Herriko Etxean
  • ASTEAZKENA 22 19:15, Herriko Etxean
  • ORTZIRALA 24, 19:15 Herriko Etxean

*Tanborra ongi bueltatzen bada 10 € itzuliko dira
** Hondatua itzultzen bada:
Partxea: 15 euro
Makil bakotxa: euro 1
Tanbor osoa: 60 euro

BAZTANGO UDALAK IKASKETA AKABERAKO PROIEKTU ETA LANAK EGITEKO DEIALDI BERRIA EGIN DU

Baztango udalak bigarren urtez segidan Baztan ikergai duten ikasketa edo master akaberako proiektu edo lanak egiteko diru-laguntza deialdia egin du. Hala, aurkeztutakoen artean 500 euroko lau laguntza emanen ditu. Urtarrilaren 13ko Tokiko Gobernu Batzordean erabakia hartu zen eta Nafarroako Aldizkari Ofizialean argitaratzekin indarra hartuko du.

Deialdi honen helburua Baztango ikasleen artean Baztani eta Baztango etorkizunari buruzko kezka eta interesa piztea da eta beraiek egin beharreko lanak edo proiektuak, helburu horretarako egitea. Proiektuak eta lanak bakoitzaren ikasketa arlokoak izanen dira.

Iaz lehendabiziko deialdia egin zen eta onuradunak Alaitz Arretxea, Josune Berho eta Oinana Otxandorena izan ziren. Beren lanak hurrenez hurren: turismoari buruzkoa, XVII-XVIII. mendeetako goi-mailako etxe tipologiei buruzkoa eta mutil-dantzei buruzkoa.

Deialdian parte hartzeko ikasleek, eskariarekin, proiektuaren edo lanaren memoria aurkeztu beharko dute, gehienez lau orrikoa. Bertan helburuak, metodologia, iturriak, oinarrizko bibliografia… zehaztu beharko dira. Memoria honek ikasketa akaberako proiektu eta lanaren tutorearen ongi ikusia beharko du.

Aurkeztutako memoriak eta proposamenak helburu horrekin osaturiko batzordeak baloratuko ditu. Bertan Elizondoko lanbide eskolako zuzendaria, Lekarozko ikastetxeko zuzendaria, Cederna-Garalurreko teknikaria, Baztango alkatea eta udal idazkaria egonen dira. Batzordeak arloko adituekin kontsultak egiten ahalko ditu.

Eskariak aurkezteko epea Nafarroako aldizkari ofizialean argitaratu eta hilabete batekoa izanen da. Udaletxeko webgunean ere oinarriak eskuratzen ahalko dira eta edozein zalantzetarako, udaletxerat joaten ahal da.

LARUNBATEAN HAZIEN EGUNA LEKAROZEN


2017/02/07

EHKOLEKTIBOREN AURKEZPEN BIDEOA

YAYO HERRERO EKINTZAILE EKOFEMINISTARI ELKARRIZKETA INTERESGARRIA EGIN DIOTE BERRIAN

«Krisi ekologikoa zibilizazio krisi bihurtu da»


«Kolapso ekosoziala» du hizpide: planetaren muga fisikoak gainditu izanaren kausak eta ondorioak aztertu ditu Yayo Herrerok. Baina klima aldaketaz harago doa haren analisia: metabolismo ekonomikoez eta gatazka sozialez mintzo da.
Irakurtzeko hemen

2017/02/05

ELUSTONDOREN ANIZKO SOLASALDIA SAREAN: BELTZ GUZIAK EZ DIRA BELE


EUSKAL NOBELA BELTZAREN ASTEAren barnean M.A. Elsutondok Gotzon Garateri buruz emandako solasaldia ilbeltza.eus webgunean paratu du (H)ILBELTZAK:

Iazko gisa berean sasoi honetan, leitzen harrapatu nau ilbeltza xuriak, (H)ilbeltza beltzak. Jainkoaren bideak asmaezinak baitira zinetan eta penetan, ez dakit zer deabruk ekarri didan halako testua, gure etxeko ordenagailu pantailara lehenbiziko, paper xurira gero. Istanteko, ez dut erran delako deabru hori identifikatzen asmatu, alegia, ordenagailu pantailara ipuin bihurri hauxe ekarri didan sorgin, azti edo iratxoa. Leitu dut testua, hala ere, eta jakin dut:  San Martinen estutasuna du izena ipuinak.

“San Martin errementaria zen. Behin, ari omen zen mailua esku batean, kurrikak bertzean burdin goriari joka, tiriki-tauki-tauki, mailuaren hotsa, tiriki-tauki-tauki, mailuaren hotsa, kolpe txarren bat jo, nonbait, eta dioska hasi zen, Jainkoaren kontra, deabruari hoska. Eta, bizitza honetan eta bertzean ohi denez, deabrua etorri, eta San Martin damutu! Eta hasi omen zen San Martin, aitzakia beti merke bila. Ernegatuta zegoelako ekin omen zion Jainkoaren kontra. Ez zela benetan ari. Deabruak, orduan, gaizki erranen ordainetan, kristautasunaren misterioak errateko agindu omen zion”.

Osoa irakurtzeko hemen: 
BELTZ GUZIAK EZ DIRA BELE

2017/02/04

BAZTANGO AGROEKOLOGIA ESKOLA HERRITARRA ABIAN DA.


Atzo eguerdian Baztango hainbat elkartek eta udalak “Baztango agroekologia eskola herritarra” aurkeztu zuten. Elizondoko Arizkunenean kultur etxean egindako agerraldian ekimen honen nondik norakoak eta eskaintza aurkeztu zituzten. Joseba Otondo alkatearen erranetan urteetan bailarako hainbat elkarteren ekimenak bateratu eta koordinatzearen emaitza da ekimena. “Sakabanaturik diren ikastaroak eta indarrak elkartu eta elkarlanarekin gorago dagoen, kualitatiboki desberdina den zerbaitean bihurtuz”. Alkatearen iritziz batasunak ikusgarritasuna ekartzen du eta eskola herritarrarekin oharkabean pasatzen ziren hainbertze ekitaldiri bertze balioa ematen zaie. Oraingo krisi ekonomiko, sozial eta kulturalaren testuinguruan geroari buruz moldatu behar horretan, bertze eginahala”.

Ekimenean parte hartu duten eragileak orotarikoak dira, aurten, Baztango Udala, EHNE, Hazitik hozie, Lekarozko Legate elkartea, Anizko elkartea eta Jo ala Jo bildu dira.  Antolatzaileek jakinarazi dutenez eragile bakoitzak ikusi du zer eta nola antolatu eta eragile bakoitza izanen da bere ikastaroaren arduraduna. Modu berean, aurten koordinatu direnak elkarte batzuk izanagatik, heldu den urtean, akaso, bertze batzuk izanen direla erran dute.

Hazitik hozieren izenean Mikel Sobrinok Baztanen gaur egun agroekologiaren ikuspegitik lanean ari diren ekoizle desberdinak daudela erran du, bazkaleku komunalak ekologikoan daudela, herritarren artean interesa gero eta handiago dela... eta horregatik, Baztanek agroekologiaren bidean erreferentea izateko ahalmena duela. Sobrinoren erranetan “horretarako, antolaketa eta elkarlana bulkatu behar dira. Eta, egiten ari garenari ikuspegi estrategikoa eta eduki ideologikoa eman. Baztango agroekologia eskola herritarrak horri erantzun nahi dio eta, horretarako, aurkezten dugu" erran du.

Aurtengo egitarauan bertzeak bertze: fruta-arbolen txerto ikastaroak, bazken aldizkatze ikastaroa, eztigintza eta erlezaintzako hastapen ikastaroa, haziaren eguna, sagardo eta sagar dastaketa… izanen dituzte.







2017/02/02

"ZER JAN,HALAKO BAZTAN" KANPAINA


Baztango Udalak "Zer jan, halako Baztan" izeneko ekimenaren bitartez, elikadura eta bertako produktuen kontsumoaren inguruko hausnarketa eta lanketa bat egiten ari da eta honen baitan bertako produktuen kontsumoa bulkatzeko ekimen ezberdinak burutzen.


Ekimen horien artean, bi hilabetez behin garaikoak eta bertakoak diren produktuen inguruko informazioa eta produktu horiekin egiteko errezetak argitaratu  eta Xaloa telebistan hauen prestaketaren inguruko saioak ere ematen dira.

Orain aukera bat gehiago eskeintzen du Udalak: "Zer jan, halako Baztan"eko errezetak whatsappez hartu nahi dituenak 689 03 50 78 zenbakira mezu bat igorri beharko du. Datuekin batera  "Zer jan, halako Baztan"eko informazioa hartu nahi duela idaztearekin aski da.

ELIZONDOKO SARRERAKO ZUBIA EGITEKO ESKATU DIO BAZTANGO UDALAK NAFARROAKO GOBERNUARI

Urtarrilaren 26an egin zen ohiko osoko bilkuran, Baztango Udalak Nafarroako Gobernuari Elizondoko sarrerako zubia egiteko eskatzea erabaki zuen. Mozio berean, Lekarozko herria kanposatuarekin saihesbidearen gainetik zaldain batekin lotzeko eskaera egitea ere onartu zen. Proposamena EH Bilduk eta Baztango Ezkerrak aurkeztu zuten eta aho batez onartu zen.

2012an Elizondoko saihesbidea ireki zelarik saihesbidetik herrigunerako sarrera Braulio Iriarte karrika meharretik egin zen jakinik, horrek buhauste handiak eta arrisku egoerak ekarriko zituela eta behin-behineko aterabidea izanen zela. Ordurako Nafarroako Gobernuak Baztan Berrin gaindi Santiago karrikan barna Elizondorat sartzeko zubia egitea aurrikusi zuen baina oraino ez du pausirik eman. Hala, egoera luzatzen ari dela ikusirik Baztango Udalak Nafarroako Gobernuari zubia egiteko eskatzea erabaki zuen.


Modu berean, saihesbidea egin zelarik Lekarozko herria kanposaturako oinezkoen pasabiderik gabe gelditu zen. Lekarozko herriak behin baino gehiagotan errepidearen gainetik oinezkoendako zaldaina egitea eskatu izan du, baina halakorik ez da egin. Horrela, lekaroztarren aldarrikapena gogoan hartuz, mozio berean Baztango Udalak Nafarroako Gobernuari aipatu zaldaina egiteko eskatzea erabaki zuen.