 |
| Pello San Millanek utzitako argazkia |
Mugaldekoak musika taldeak kontzertu xarmangarria eman zuen atzo gainezka zegoen Elizondoko
Arizkunenea kultur etxean. Kultur etxeko sabaiko zurajeen gerizpean beratarrek poesiak,
kantuak, antzerkia, soinu tresna desberdinak erabiliz musika-bidai paregabea
eskani zuten, bai lurralde desberdinetan barna: Portugal, Okzitania, Quebec,
Ameriketako Estatu Batuak, nola musika estiloetan ere: fadoa, folka, bluesa…
eta autore ezagun eta ezezagunen kantuetan barna ere: Bod Dylan, Johny Cash,
Leonard Cohen… Musikarako abilezia bereziarekin Raul Gartziak, Joseba Baleztenak
eta Beñardo Goietxek Mugaldekoaken
azken diskan bildutako kantak eman zituzten, borobil borobil. Aldi berean, Edu
Zelaietak, olerkien irakurraldiak tartekatzen zituen, bere uztakoak eta munduko
bazter desberdinetakoak. Taula gainean txukun moldatu ziren, eroso ikusten
zitzaien, gozo, kantutik kantura, poesiatik poesiara jarrerak eta moldeak
egokituz, antzezpen ukitu batekin baina natural deus behartu gabe, horrela,
emanaldia koxka bat gorago eramanez. Modu berean Beñardo Goietxek bere ahots
bereziarekin, erregistro aldaketekin eta jokoekin kontzerturat hurbildutakoak harriturik utzi
zituen.