GAZTE EGUN IKARAGARRIA (GOIZEKO KRONIKA )

Eguraldi hitsari kontra eginez Elizondon egindako Baztango gazte eguna belaunaldi berrien sormen, kezka eta antolakuntzaren isla ederra izan zen. Goizean goizetik gaitari talde kozkorrak larunbata goizeko loa aprobetxatuz zebiltzan herritarrak izorratu, iratzarri eta jeikiarazi ondotik, karrikak inarrosi eta euri-goibelak instant batez guttienez geldiarazi zituen. Geroxeago, gaztetxearen pareko gorapean break dance erakustaldi ikusgarria izan zen. Disko jartzailearen musika oinarri mestizatuen erritmo markuetiekin jostatuz, gorputza modu pentsaezinean dantzaraziz eta koreografia onirikoak eraikiz bertaratutakoak zur eta lur gelditu ziren.
Goizekoari buruz pena bakarra grafitti erakustaldia egitera etortzekoak zirenak, azkenean, abdukzio bat tarteko, Esne-bidean galdu eta ezin izan zirela bertaratu. Lerro hauek idazteko tenorean ez genekien nonbait agertu ote ziren edo transustantziatu ote ziren. Ordurako garagardo urrupaldiak gibelerako bidea egiten ari ziren eta gibeletik odol sisteman barna buruko muinetara. Alta, egunaren hasiera bertzerik ez, eta Gure esku dago ekimenaren aurkezpenerako oraino fresko, gaztetxean jende mukurua bildu eta erabakitze eskubideari buruz abiatu den herri ekimenaren berri izan zuten. Momentua bideo ttipi bat grabatzeko baliatu zuten, pentsa zitekeenaren kontra, publiko guztiak ikusi ahal izateko moduko bideoa izanen da. Bizkitartean material kontraiformatiboekin eta Baztango borroka sozialetako gauzekin postuttoa muntatu zuten. Segidan bazkariaren tenorea etorri zen, zeinean 100 lagunetik goiti elkartu baitziren. Goizean barna sukaldari txanoekin Baztandarren Biltzarreko egoitzan bazkaria prestatzeko itxurak egin bazituzten ere, iduriz, bazkaria kooperatibatik ekarri zuten: luzerna fardoak. Modu horretan jendea piztiaturik, urdaila bero eta inspirazioa tragoka Eztanda batukadarekin Elizondoko karriketan barna abiatu ziren.