Hassana Aalia, Euskal Herrian bizi den Saharar iheslariari
Espainiak asilo politikoa ukatu diola salatzeko, 40 bat pertsonak
Elizondoko plazan elkarretaratzea burutu zuten.
Hassana
Marokok militarki okupaturiko Mendebaldeko Saharako Aaiún hiriburuan
sortu zen 1988an. Gaztetatik bere herriak sufritzen zuen zapalkuntza eta
errepresioaz jabeturik, giza eskubideen defentsan militatzeari ekin
zion. Horren ondorioz, hainbat aldiz atxilotua eta torturatua izan zen
Marokoako poliziaren eskutik. Azken aldiz, 2011n Saharar jendarteak
jasaten zuen egoera penagarria salatzeko protesta bezala eraiki zuten
Gdeim Izik kanpamentuaren bortizki ustearen harira atxilotu zuten,
berriz tortura latzak salatu zituelarik.
2012an Euskal Herrira
etorri zen ikasketa beka bat zela medio eta bertan zegoela bera
atxilotzeko agindua emana zegoela jakin zuen. Orduan Espainiar estatuan
asilo politikoa eskatu zuen.
2013an Gdeim Izik kanpamentuan
atxilotutako ekintzaileen kontrako epaiketa egin zen Rabateko epaitegi
militarrean eta Hassana nahiz eta ez zen epaiketa hartan izan,
biziarteko kartzelara zigortua izan zen bertze hainbat Sahararrekin
batera.
3 urtez asilo politikoa emango ote zioten zain egon
ondotik ezezkoa jaso du eta Espainiar herrialdea bi asteren buruan
uzteko agindua eman diote.
Ekintzaile saharar honen
kasua salatzeko eta orohar saharar herriak bizi duen muturreko egoera
salatzeko Euskal Herrian egiten ari diren mobilizazioen harira deitu
zuen elkarretaratzea Baztango Askapenak.
Bide batez,
Saharaztan elkarteak Otsailaren 27rako (Saharar Errepublika
Demokratikoaren aldarrikapenaren urteurrena) antolatua duen elkartasun
egunean parte hartzeko deia ere egin zuen. Arratsaldeko 7etan donezteben
egitekoa den elkarretaratzean eta ondotik Zubietan eginen den hitzaldi
eta afarian parte hartzekoa, alegia.
