Baztango Zahar Etxean lan zama gehiago, murrizketa gehiago eta lan eskubide guttiago. Aski da!!!
Baztango Zahar Etxeko langileak Zahar Etxean bizi den egoera salatzera atera gara, eta aldi berean Baztandar guztiei jakinarazi nahi izan diogu ez Zahar Etxeak ezta bertako langileok ere ezin dugula horrela jarraitu, nahikoa dela!
Gibeletik heldu den zerbaiten aintzinean gaude; hau da, 2009an Patronatuak onartutako pribatizazioaren ondorioak jasaten ari gara, eta denborak zoritxarrez bere garaian salatu egin genuena berretsi bertzerik ez du egin. IDEA enpresak kudeaketa hartu zuenetik Zahar Etxearen egoera ekonomiko kaxkarra argudio bezala erabilita diru sarrerak gehitzen eta gastuak murrizten saiatu da etengabean, eta noski gastu murrizketa horretan langileen lan baldintzak ere sartu dira.
Gogoratuko duzute nola Lan hizarmenaren negoziaketa hilabete luzez blokeatuta egon zen enpresak behin eta berriz soldatak jeitsi behar zirela erraten zuelako. Azkenean borroka luzeen ondotik akordio batetara iritsi ginen, baino denborak erakutsi digu enpresaren nahiak ez zirela orduan bukatu eta toki batetik ez bada bertzetik murrizten saiatzen dela etengabe. Konkretuki egoera abuztuan zuzendari berria sartu zenetik izugarri okertu da. Zuzendari berria sartu zenetik inposaketa eguneroko ogia izan da. Zahar Etxe guztain aldaketak egiten ari da langileekin eta langileen ordezkariekin deusetarako kontatu gabe, legeak erraten duena bete gabe eta inposaketa erabiliz arma moduan.
Barne promozioa desagertu da enpresan, inork oraindik garbi azaltzen ez digun arrazoiak direla medio. Enpresak langile batzuek titulurik ez dutela erabiltzen du aitzaki bezala, baino aldiz langile batzuk titulazio gabe ere kontratatu ditu. Honi gehitu behar zaio Nafarroako Gobernuak 2016 arte luzatu duela titulua ateratzeko epea; gauzak horrela IDEA langile batzuk baztertzen ari da, lanean ez daduden bertze langile batzuk kontratatuz. Egoera guzti honetan langile batzuk ikusita urteak daramatzela Zahar Etxean lanean eta beraien lan baldintzak hobetzeko aukerarik ikusten ez dutenez lana uzten ari dira egoera honekin nazkatuta.
Bertzetik enpresaren eta bereziki zuzendariaren jarrerak bereziki larritu egiten gaitu Zahar Etxeko langileei eta eskaintzen den zerbitzu publikoari dagokioenean. Zuzendariak guri horrela erranda berari enpresatik helburu ekonomiko batzuk jartzen zaizkio eta marjina horitan berak kudeaketa bertzeik ezin omen du egin. Guretzako honek berebiziko larritasuna du ez baikara ari industriako enpresa batetaz solasean zerbitzu publiko bati buruz baizik, eta konkretuki Zahar Etxe batetaz agureekin lan egiten den zentru bat eta menpekotasuna duen jendearekin lan egiten den zentrua.
Filosofia horrek benetan beldurra eta kezka sortzen digu, eta uste dugu norabide okerrean doala. Murrizketak eguneroko ogiak dira, ordezkapenak ez dira betetzen, bajak ez dira betetzen, eta ondorioz agureei eskaintzen zaien zerbitzua ez da egokia, gabezi nabariekin, eta oinarrizko beharrak bete gabe. Ondorioz egoera honek langileengan bakarrik ez, erabiltzaileen senitartekoen artean ere kexak sortu ditu.
Gauzak horrela eta aipatutako guztiarengatik kalera irten beharrean gaude, Zahar Etxeko langileengatik eta Zahar Etxearen etrokizunarengatik. Benetan sinisten badugu Baztango Zahar Etxeak kalitatezko zerbitzu publiko bat eskaini behar diela Baztandarrei norabidea aldatu behar da. Bakoitzak bere eremuan ikusiko du zer egin behar den baino Zahar Etxearen hobebeharrez mesedez aldatu dezagun norabidea