Joan den astelehenean Florentino Goñi Baztango udaleko
herri-lanetako zinegotzia eta Joseba Otondo Baztango udaleko alkatea Manu
Aierdirekin Nafarroako ekonomi garapeneko lehendakariordearekin Iruñean bildu
ziren. Bilera Baztanek joan de irailan eskatu zuen eta helburua bailarak dituen
azpiegitura beharretaz aritzea zen. Modu horretan Goñik eta Otondok
beharrezkoak diren azpiegituren zerrenda helarazi zioten: Elizondoko sarrerako
zubia, Lekaroz hilerriarekin lotzeko saihesbideren gainetik egin beharreko
oinezkoen zaldaina, Ordokiko bidegurutzeko biribilgune edo errotonda, Beartzuneko
bidean zabalguneak egitea eta Elizondorainoko Bide Berdeko tartearen
finantziazioa. Aierdik gobernuaren finantza egoeraren berri eman zien, UPNren
garaiko itzalpeko bidesariek, adibidez, urtero 60 milioi euroko kostua dutela
eta horrek departamentua aunitz estutzen duela. Beren lehentasuna, errepideen
kontserbazioa dela erran zuen eta proiektu berriak ondoko urteetako finantzen
bilakaerarekin lotu zituen. Konpromiso zehatzik ez zuen hartu.
Bertzalde Baztango udaleko ordezkariek Belateko tunelei
buruz galdegin zioten eta, Aierdik, ondoko hiru urteetan segurtasuna hobetzeko
7 milioi euro inbertituko dutela erran zuen; aurten, 200.000. Diru horrekin elektrizitateko bigarren
lerroa, estraktoreen berrikuntza e.a. eginen dute. Modu berean Goñik eta Otondok N121A
errepidearen segurtasunaz galdegin zioten eta gobernuak errepidearen segurtasun
eta arriskuen azterketa eta balorazio ekonomikoa eginak dituela erantzun zien,
nahiz hobekuntza horiek noiz eginen diren ez argitu.
Aroztegia eta herri
galdeketa
Azpiegituretaz gain, Baztango hautetsiek bileran Aroztegiari
buruzko gaia atera zuten. Manu Aierdiren kontseilaritza Aroztegiko proiektu
bulkatzen ari dela jakitun, Baztango alkateak PSIS gelditzea eta galdeketa
egitea beharrezkoa dela erran zion, hori dela gehiagorat ari den gatazka sozial
hau demokratikoki eta zentzuz konpontzeko bide bakarra. Halaber, Baztanen etorkizuna
guztiz baldintzatuko duen halako proiektua tokiko erakundeen eta herritarren
gainetik PSIS bidez tramitatzea ez dela inondik ere onartzen ahal erran zion. Aierdik,
PSIS defenditu zuen.