PENTSIOEI BURUZKO ELIZONDOKO HITZALDIAN EH BILDUK 1080 EUROKO GUTTIENEKO PENTSIOAK ALDARRIKATU DITU



Ortzegun ilunabarrean pentsioei buruzko hitzaldia antolatu zuen EH Bilduk Baztanen. Elizondoko Arizkunenearat bildutakoen aitzinean Maiorga Ramirez EH Bilduren Nafarroako parlamentariak eta Patxi Urrutiak EH Bilduko kideak herritar guztien duintasuna eta eskubideak bermatzeko 1080 euroko guttieneko pentsioak aldarrikatu zituzten.

Ezkerreko subiranisten koalizioaren izenean Patxi Urrutiak pentsioei buruzko gogoeta egin zuen, bereziki nabarmenduz pentsioetarako dirua egon badagoela. Amaiurtarraren erranetan boteredunek pentsioetarako diru aski ez dagoela sinitsarazi nahi dute baina hori gezurra da. Bankuak erreskatatzeko, azpiegitura handietarako eta ejerzitoetarako zernahi diru erabiltzen baita. Beraz, noren alde egin nahi den da kontua, jendeen alde edo negoziozaleen alde.

Maiorga Ramirezek pentsio sistema pribatizatzeko abiatu den dinamika politiko eta ekonomikoa salatu zuen. Horren aitzinean EH Bilduk pentsio sistema publikoa defenditzen duela erran zuen, herritar guztiei duintasuna bermatuko diena. Horretarako Nafarroak pentsioak kudeatzeko eskumena behar duela erran zuen. Herritarren eskubide sozialak segurtatzeko bidea burujabetza dela aldarrikatu zuen. Modu berean, pentsio publikoak aurrekontu orokorrekin finantziatzearen alde egin zuen.

Mintzaldiaren ondotik izandako eztabaidan,bertaratutako batek oraingo pentsio sisteman emaztekiek bizi duten bazterketa salatu zuen. Emazteki aunitzek pobrezia mailaren azpitik dagoen pentsioa izaten dutela eta, gainerakoan, gizonkiek eta emaztekiek banaz bertze hartzen duten pentsioen artean alimaleko tartea dagoela. Tarte hori berdindu behar dela erran zuen denendako pentsio justuak segurtatuz.