2018/05/04

ERASO SEXISTEN KONTRAKO PROTOKOLOA MARTXAN HERRIZ-HERRI



Atzo arizkunenean Baztango Talde Feministak, zenbait herrietako bestetako antolatzaileek eta udaleko berdintasun zerbitzuak prentsaurrekoa egin zuten eraso sexisten kontrako protokoloa aurkezteko. Galdera sorta baten ondotik bestak DENEK GOZATZEKO direla aldarrikatu zuten. Eskeinitako zerbItzuen berri eman zuten ere. Horra hitzez-hitz errandakoa:

Eguna luzatuz doa, eguraldi ona, eguzkia, txorien kantak eta tragoak lagun artean. Ixtente herrietako bestak. Bestak, urte osoa esperoan egon eta horrenbertze gustatzen zaizkigun egunak. Eguneroko errutina alde batera utzi eta dantza, irria, alkohola, elkartasuna, eta GO-ZA-ME-NA nagusitzen diren egunak.  

Alta, jakin ongi badakigu dena ez dela ideala, eta  bestetan ere,  egunerokotasunean dauzkagun rolak, balioak, botere harremanak eta zapalkuntzak erreproduzitzen direla. Hori horrela dela ikusirik, ondoko galderei erreparatzea bertzerik ez dugu.

Nork parte hartzen du antolakuntzako batzordeetan? Noren hitzak du pisu gehien? Nork hartzen ditu plazak? Nork sentitzen du bere burua oholtza gainean dagoenarekin identifikatua? Nork prestatzen ditu etxe gehienetan egun berezi hauetako otorduak? Nork dantzatzen ditu mutildantzak plazetan lasai eta inolako irainik jaso gabe?  Nor mozkortzen ahal da eta etxera lasai joan inoren konpainiarik gabe?

            Bestetan denok parte-hartzeko eskubide bera izan eta sentitu behar dugu. Horretarako besta eredua irauli beharra dago,  emakumearen parte hartzea indartuz eta duen protagonismoa bereganatuz.  Bestak denek gozatzeko egunak direlakoz, GO- ZA-TZE-KO!

            Bestetan alkoholez bustitako barkamen kapa paratu eta dena libre den aitzakiapean emakumeok mota guzietako eraso sexistak jasaten ditugu. Baina aurten emakumeok ez dugu ukipenik, irainik, piropo matxistarik, mespretxurik, abusurik ez eta bortxaketarik onartuko. Nazkatuta gaudelakoz eta tenorea delakoz gure biktima paper pasibotik atera, emakumeok  elkartu eta AUTODEFENTSA FEMINISTAri ekiteko. 

Bistan da, gure esku dagoela egoera hauekin guziekin akitzea. Kasu larrienetan ere, ez baitugu justizia patriarkal honengatik deus esperatzen ahal. Ikusi bertzerik ez dugu, 2016an Iruñeko Sanferminetan bortxatua izan zen neskarekin pasatu dena. Hortaz, eta egoera hauek kasu isolatuak ez direlakoz,  beharrezkoa dugu espazio seguruak sortu eta horrelako jarrerei gogor erantzutea. Gauak eta karrikak gureak ere badirelakoz,  eta bestetan askatasun osoz eta beldurrik gabe gozatzeko nahia eta eskubidea dugulakoz.

Honengatik guziagatik, aurten ere, Baztango talde feministak, besta batzordeekin eta udalarekin batera indarkeria sexistari aurre egiteko protokoloa martxan paratu du. Protokolo honen helburua, emakumea babestea eta babes sarea eskaintzea da.

Gehiago luzatu gabe eta akitzeko, herritar guziei dei egin nahi dizuegu, indarkeria sexistaren aitzinean besoak gurutzaturik ez gelditzeko eta eraso sexistei gogor erantzuteko. Horretarako Baztango herrietako bestetan, protokoloa aktibatuko dugu.
 Honen bitartez, zerbitzu ezberdinak eskainiko direlarik:
1-Salaketa eta babes publikoa: Talde feministaren eskutik 664964285 telefonora deituta.
2-Laguntza psikologiko eta juridikoa: Udalaren eskutik: 948580006 telefonora deituta.
3-Larrialdi zerbitzua: 112 telefono zenbakira deituta.

Denon esku dago indarkeria sexistarekin akitzea.
ERASORIK EZ ERANTZUNIK GABE!!!