2018/05/04

MANIFESTAZIO JENDETSUA EGIN ZEN BAZTANEN N-121-A SEGURUA ESKATZEKO



N121A SEGURTASUNA. Belateko bide zaharrean barna nazioarteko kamioiak pasatzen ez utzi.

Eskakizuna sinplea da. N121A errepidean gaur egun egunero 8000 ibilgailutik goiti ibiltzen dira, ia 9000. Horietarik 3800 ibilgailu astunak.

Belateko tunelak hetsiz gero, Belateko bide zaharrak joan-etorri hori guztia ez du jasaten ahal, ezinezkoa da. Horregatik, Nafarroako Gobernuari behin eta berriz nazioarteko zama garraioren pasa debekatzeko eskatu diogu.

Belateko tuneletatik 3800 ibilgailu astun ibiltzen badira, horietarik %66 pasakoak dira; ez dira gure inguruetarat etortzen. Segurtasunarengatik, bertze nonbaitetik joanaraztea beharrezkoa da.

2000. urtean, Belateko tunelak ireki zituztelarik banaz bertze egunero ia 800 kamioi ibiltzen ziren. Orain, 3.800.  3.800! Norbaitek uste du Belateko bide zaharrak hori jasaten ahal duela? Herritarrek badakigu ezetz!

Gure eskakizuna ez da erokeria. Lehenago Gironan N2an egin zuten eta, orain gutti, Errioxan N232an.  Egingarria da. Horretarako borondatea izanez gero bederen.

N121A errepidean egunero inguruetako jendeketa gorra harat-honat mugitzen da: lana, ikasketak, medikua, zerbitzuak… eta bertze gisakoak direla-eta. Errepide horretan segurtasunez ibili nahi dugu eta gure ingurukoengatik kezkarik eduki behar ez izan. Ez bederen, bertze tokietan baino gehiago.

Erabateko segurtasunik ez dagoela jakin badakigu. Eta, hori, doike, halabeharrez onartzen dugu. Onartzen ez duguna da alferreko arriskua sorrarazi dezaketen egoerak baimentzea da. Badakigu, hortaz, Belateko bide zaharra pasako kamioiei hesteak ez duela erabateko segurtasunik ekarriko; baina onartzen ez duguna da alferreko arriskua baimentzea nazioarteko zama garraioaren pasa utziz.

Horregatik, Nafarroako Gobernuaren azkeneko proposamena: pasako ibilgailu guztien matrikularen araberako aldizkako mugapenarena ez dela aski erraten dugu. Gainera nahasgarria da eta betetzeko, gure usten zaila edo ezinezkoa. Hau ez da merkatu eguneko tratu kontua. Ez dugu gure segurtasunarekin tratularitzan aritu nahi.

Belateko tunelak hetsiko dituztelako bide zaharretik ibili beharko gara, ados. Baina ahalik segurtasun handienarekin ibili nahi dugu. Ez gehiago, ez guttiago ere. Eta, hori nazioarteko zamaren pasa debekatuz bakarrik egiten ahal da.

Ez dugu errepide honetan izan diren ezbehar eta istripuen zerrendarik egin nahi, ez horien erabilerarik ere. Sobera nahigabe baitago. Baina horietarik guztietatik ohartarazi nahi dugu. Bide zaharrak duen arriskuaren aitzinean inork ez ikusiarena egin ez dezan.

Akitzeko, gaur honat bildu gaituen eskakizuna berriz aipatuko dut, bere sinpletasunean edonork ulertzeko modua baita. Hau da Nafarroako Gobernuari eskatzen dioguna:

N121A segurtasuna. Belateko bide zaharretik nazioarteko zama garraiorik ez.