Etxeetan adineko jendeak
zaintzen lana egiten duten langileen lan-baldintzei buruz herritarrak
kontzientzia hartzeko kanpaina abiatu berri du Baztango Udalak.
Kanpaina hau etxeko
langileekin egindako gogoeta prozesu baten emaitza da, azkeneko hilabeteetan egin
dena, bilera irekien bidez, Bidelagun laguntza emaile elkartearen
laguntzarekin. Kanpaina hau egun hauetan Baztango etxe guztietarat banatzen ari
den eskuorrian oinarritzen da.
Etxeko langileei buruz
ari garela etxeetan adineko jendeak edo menpekotasun egoeran dauden pertsonak
zaintzen aritzen diren langileetaz ari gara, horietako aunitz interna moduan,
eguneko 24 orduak esklusibotasunez eta arduraz osoz eginkizun horretan arituz.
Langile horiek, etxeko lanak eta mantenimendua egiten dute eta horretaz gain,
bertze hauek ere bai: sendagaiak eman, ospitalizazioetan zaindu, paseoetan
lagundu…
Etxeetako langileen
lan-baldintzei buruz ari garela bi kontu
bereziki aipatu behar dira:
batetik sektorearen
erregulazio falta eta, bertzetik, administratiboki egoera irregularrean dauden
langileen egoera. Guzti horrek, maiz, soldata eta lan baldintza makurragoak
izatea ekartzen du. Modu berean, maiz ere, interna gisa ari diren etxeetan pribatutasunik
eta espazio pertsonalik ez dute, aisialdia eta denbora librea eskas izaten dute
eta horrek, langilearen gainkarga fisiko
eta mentala ekartzen du bizi prekaritatea
handituz.
Horregatik etxeetan
adineko pertsonak zaintzeko langileak kontratatzen dituzten herritarrengana
hurbildu nahi dugu, denen artean, langile hauei ere, interna edo externa aritu,
lan-baldintza duin eta bidezkoak eskaintzeko.
Eta lan-baldintza duin
eta bidezkoak izateko beharrezkoa da guttienezko lan-saria ematea eta behar
adina asti libre segurtatzea; zaintzaileak ere zaintzea eta adinekoekin egiten
duten lana baloratzea.
Hortaz, nahiz sektorea
arautzea eta atzerritartasun legea aldatzea udalaren eta herritarren eskuetan
ez egon, neurri batean bederen, aipatu ditugun lan-baldintza justuak eskaintzea
gure esku dago. Horregatik, herritarrak errealitate honi buruz ohartarazi nahi
ditugu, bertze langileekin ere justuak eta etikoak izan daitezen.
Informazio gehiagorako:
-Gizarte Zerbitzua
Tel: 948 580 006
gizartezerbitzua@baztan.eus
gizartezerbitzua@baztan.eus
- Bidelagun