Kattalin Arizmendi: "Internet drogaren bezeroak gara"



Nola heldu gara hona? Saguzarrek dute errua?

Agian egia da saguzarrek eragina izan dezaketela birusaren jatorrian edo hedapenean, baina ez dugu ahaztu behar kutsatzen ari garenak gizakiak garela, eta gu ere izan gaitezkeela erokeria guzti honen sortzaile. Birus honek, mozorroa kendu digu gizakioi, gure ahultasunak azaleratuz eta antolatzeko nahiz bizitzeko dugun modua zalantzan jarriz.

Gerran gaude?

Uste dut etengabeko gerran gaudela, birusa "kasualitatez" agertu baino lehenago ginen, orain gaude eta egongo gara. Hau guztia hasi baino lehenago, bakoitzak gure liskarrak genituen, gauza aunitzekin desadostasunak eta geldialdi honek aukera eman digu gogoeta bat egiteko , gure lehenagoko bizitza azeleratu horrek ematen ez zigun aukera. Errandakoa kontutan hartuz, agian, hau bukatzean, gerra handituko da eta etxean gorde ditugun desadostasunak kalera aterako ditugu.

Zein eragin izaten ari da, pertsonalki?

Nire buruarekiko eztabaidan murgiltzen naiz aunitzetan, eta emozioen gorabehera nahiko handiak ditut.  Bertzetik, ikasle naizen aldetik, ez dut estres handirik baina egia da edukiak ezin ditugula berdin ikasi, gainera, hezkuntzan dauden ahuleziak agertu dira eta ondorioak ikasle nahiz irakasleek jasan behar ditugu eta ez hezkuntza sistema ezarri dutenek.

Pandemia honek denoi berdin eragiten digu?

Bistan geratu da ezetz, ez dut uste Baztango denda txikietan lan egiten dutenak Amancio Ortegaren maila berean egongo direnik, argi dago ez diela berdin eragingo. Ez dut uste berdin eragingo digunik guri edo etxerik ez duen bati, eta horrelako bertze hainbertze adibide. Denda txikien gaiaren harira, uste dut denok konturatu garela ze isila eta tristea den Baztan dendetako pertsiana jaitsiekin, kaleetan jenderik gabe.  Konturatu beharko ginateke eta gure kontsumismo basati nahiz zapaltzailea kolokan paratu beharko genuke: noraino ailegatzeko prest gaude? Zeren truke lortu nahi ditugu gure 5 euroko kamisetak? Zergatik ez ditugu bertako jakiak kontsumitzen?

Jardun esentzialek, gehienek, emakume aurpegia dute. Zer adierazten du horrek?

Orain arte beharrezkotzat hartzen ez ziren lanetara bideratuak zeuden emakume aunitz, ordu kopuru gehiegi eta gaizki ordainduekin. Ea behingoz konturatzen garen zer den garrantzitsua.

Baztanen zer egoera uzten ari da pandemia?

Baztanen eragin handia izango du, azkenaldian turismotik bizi izan da jende aunitz, baina badut esperantza jendea desberdin aterako dela kanpora. Pentsatu nahi dut denek gehiago babestuko dugula hemengoa dena, lehenago gauza aunitzez genuen ideia aldatuko dela.

Baztanen nola egin aurre pandemiari?

Elkarbizitza eta elkarlana uste dut direla modua, denen arteko konfiantza eta norberaren ardura. Uste dut arras erreza dela gizartea orokorrean epaitzea baina ez dugu ahaztu behar gizartean gu gaudela eta ahal dugun heinean korapiloak askatzen ahal ditugula.

Gizarte hiperkonektatu baten aztarnak ugaritu dira. Interneten topatuko al dugu elkar?

Bai, teknologia berrien kontrako argudio gehiago bildu ditut azken aldian, erabateko kontrola inposatzen ari dira eta gu konturatu orduko dena jakingo dute. Hala ere, interneten sartzen naiz egunero,  etxeko lanak  google bidez egiten ditut eta instagram eta whatsapp aunitzetan sutan daude, erran daiteke internet drogaren bezeroak garela.

Egoera honen aurrean, borroka da …

Beharrezkoa, baita autokritika ere.

Liburu baten irakurketa gomendatuko al zeniguke. Zergatik?

Bi liburu aukeratu ditut, bietan emakume idazleak. Hasteko, Kirika FM bizi garen munduei begira, Elurre Iriarteren liburua, urrunago joan gabe etxekoa dugun liburua, badakit Baztango aunitzek irakurri izanen duzuela baina irakurri ez duzuenentzat horra luzapena, inguratzen gaituzten hainbat gairi buruzko kritika, niri arras ongi etorri zait gai batzuez gehiago jakiteko eta gogoetan murgiltzeko.
Bertzetik, Nora ez dakizun hori , Irati Jimenezen liburua, maitasun istorio bat dela esan dezakegu, bi istorio lotzen dituena, alde batetik Martin argazkilaria dago eta bertzetik Nora irrati-esataria. Nahiko misteriotsua da, bukatu arte irakurtzen gelditzen zaren horietakoa.