Garai
gogorrak bizitzea tokatu zaigu, covid-19ak eragindako osasun krisia, hagitz
larria izaten ari da eta uzten ahal duen egoera ekonomikoa are larriagoa izan
daiteke.
Honi, Baztan-Bidasoan, gure karrikak eta
komertzioak uniformatutako militarrez beteta eta inposatutako muga artifizialak,
bertakoentzat existitzen ez direnak eta orain fisikoak direnak, kanpamentu
militar inprobisatuak bihurtuta ikusi beharra gehitu behar zaio, azken honek
herritarren egunerokotasunean kalte zuzena sortuz aunitzek mugaren bertze
aldean lan egiten bait dute. Espainiar ikur eta guzti, berez, egunero dugun
indar okupatzaileen presentzia onartezina handituz.
Ez dugu,
gure osasunaren izenean, eskualdea militarizatzerik onartuko. Are gehiago beraien
presentziak, helburu identitarioak baino ez dituenean, etengabeko joan etorriekin
gerra egoeran egongo bagina bezala, eta handikeriaz aritzen direnean; hainbat
lekutan, kontsumitu ondoren, ordaintzeari uko eginez adibidez.
Jarrera
horren bertze adibide bat dugu, duela aste pare bat, Lesakako gazte bati,
metraileta eta guzti, egindako “galdeketa” inprobisatua. Horrelako jarrerak ez
dire berriak ez eskualdean eta ezta Euskal Herrian ere. Aski ongi dakigu nortzuk
diren eta zertara etortzen diren eta garbi dago beraien helburua ez dela herri
hau zaintzea, kontrakoa baizik.
Osasuna
zaintzearen “argudioa” aitzakia dela garbi gelditzen da, herria izan bait da
instituzioek publikotasunaren gestio txarraren ondorioz sortutako gabeziak
asetzeko antolatu dena; medikuak, erizainak, zaintzaileak, suhiltzaileak,
elkartasun sareetako kideak... Instituzioen gestioa txarra izan bada ere,
aparteko aipamena merezi dute eskualdeko udaletxeek, herritarrekin eta
langileekin kokatuz. Bitartean, justifikaezina den gastu militarra
inposizioarako, kontrolerako eta propagandarako (egin dituzten desinfekzio lan
gutxi horiei izugarrizko oihartzuna emanez, Elizondoko zahar etxekoa adibidez)
erabili izan da. Dirua zerbitzu publiko duinentzako behar dugu eta ez gure
herrietan armaturik joaten diren indar okupatzaileentzako!
Covid-19aren
krisiaren aitzakipean, Espainiako gobernuak egindako politika birzentralisten
artean bertze bat dugu hau, baina ozen aldarrikatzen dugu, ez ditugula nahi
ezta behar ere Euskal Herrian!