ALMANDOZEK HARROBIA HANDITZEA ERABAKI DU


Almandoztarrek atzo egindako herri galdeketan harrobia handitzeko baimena ematea erabaki zuten. Herri galdeketa herriko zentsoaren %25ak eskatuta egin zen eta bertan, 150 herritarrek bozkatu zuten, zentsoaren %79ak. Alde bozkatu zutenak 87 izan ziren (%58); kontra 62, (%41) eta xuri bat.
Modu berean, harrobiko sarrera-irteera berria egiteko hiru aukeren artean bozkatu zuten, eta %44ak, hau da 67 herritarrek Abreiko aukeraren alde egin zuten, teknikoen iritziz, aukerarik hoberena. Oraingo bidea mantentzearen alde %32 ak egin zuen, 48 herritarrek; eta Goiureko egitasmoaren alde berriz %14ak, 21 herritarrek. 14 bozka baliogabe edo xuri izan ziren.

Gauzak horrela, gaur atsaldean eginen den Baztango Batzar Nagusian Almandozko herri galdeketako emaitzak aurkeztu eta zuzenbidean, Batzar Nagusiak harrobia handitzeari baimena emanen dio.
Almandozko harrobian 14 langile ari dira lanean eta Baztanek dituen 1000 km. pistetarako zaborra harrobi horretatik ateratzen da.
Joan den abenduaren 26an Almandozen egindako batzarrea harrobia handitzearen aurka agertu zen, haatik, erabakia urtarrilaren 2an, Batzar Nagusian aurkeztu zelarik, herriko alkateak erran zuen herritarrak ez zeudela arrotean kontra, akordio bat nahi zutela baizik. Gauzak horrela, Batzar Nagusiak harrobiko jabeekin, kaltetuekin eta herritarrekin solasteko eta akordioetarat iristeko batzordea osatu zuen, proposamenak aldeko 24 bozka izan zituen eta 6 abstentzio. Inork ez zuen aurka bozkatu. Geroztik batzordeko eta udaleko ordezkariek hainbat bilkura egin dituzte eragile desberdinekin onargarria izan zitekeen akordioa eskuaratzeko. Atzo herri galdeketa batzordearen lanak akituta egin zen.