AROZTEGIA PROIEKTUAREN BERRIKUSPENA ONARTU DU UDALAK


Baztango udaletxeak atzo egindako ez ohiko osoko bilkuran Aroztegiako proiektu urbanistikoa geldiarazteko plan partzialaren behin betiko onarpenaren berrikusketa egitea onartu zuen. Proposamenaren alde Bilduko bortz zinegotziak, Ezkerrako biak eta Nafarroa Baikoa agertu ziren. Proposamenaren aurka berriz UPN. Orain espedientea Nafarroako Kontseilurat eramanen da eta honek loteslea den irizpena emanen du. Udaletxeak eskatutako txosten juridikoaren berri eman ondotik hartu zen erabakia; bertan egitasmoaren banaketa areari buruzko egoera juridikoa aztertzen zen. Txostena egiteko udalak hainbat eskaera egin dizkio enpresa sustatzaileari baina honek ez du deus erantzun.


Udalak egindako txosten juridikoak dio udal planaren egiturazko aldaketa puntualaren behin betiko onarpena auzibideetan dagoela eta baliogabea izan daitekeela eta onartu den plan partzialaren txostenak prozedurazko irregulartasunak dituela. Modu berean plan partziala legezko epeak pasatuta aurkeztu zela erraten du. Bertzalde plan partzialaren behin betiko onarpenaren inkoazioa legez baliogabea dela dio, lurzoru berriak klasifikatzen dituelako. Hori egitea determinazio estrukturatzailea da eta ez dator bat Herri laneko zuzendaritzak ezarritako determinazioekin.

Aroztegiako proiektuan, bertzeren artean 252 bizitza berri egin nahi dituzte eta horiek egitera Lekaroz ondoan 800 pertsonako herri berria sortuko litzateke. Bere garaian Lekarozen egin zen herri galdeketan parte hartzaileen %67 proiektuaren aurka agertu zen. Proiektuaren sustatzaileak Arozena-Urbistondo eta Nova Caixa Galicia dira. Kutxa hau burbuila inmobiliariako erangidako diru-kontuen kaskartzearengati estatuak interbeniturik dauka.

Aitzineko legealdian Baztango udalak proiektu urbanistikoa egin ahal izateko Udal Planaren aldaketa puntual estrukturatzailea behin betiko onartu zuen. Eta horrek, oraingo egoera ekarri du.