EHUN HERRITAR INGURU SAIHESBIDEARI BURUZKO BATZARRREAN

Elizondoko saihesbidea herrira sartzeko zubirik gabe inauguratuko dute ortziralean. Horrek izanen dituen ondorioak aztertzeko Elizondoko Herriak eta Baztango udaletxeak batzarrea deitu zuten Elizondoko Baztan Berri auzoan; ehun herritar inguru hurbildu ziren eta momentuz, sahiesbidearen Baztan Berriren zatia ez irekitzeko erabaki zen.

Ilunabarreko 20:00etarako elizondarrak eta Baztan Berri inguruko auzotarrak auzoko plazarat hurbildu ziren, baita Elizondoko alkatea Xabi Torres eta udaletxeko alkateordea Mikel Ortega eta Florentino Goñi Herri lanetako zinegotzia ere. Xabik azaldu zuenez sahiesbidea diseinatzeko tenorean esposizio publikoaz harago ez zen deus egin herritarren parte hartze aktiboa bulkatzeko eta horrek, hainbat gabezi ekarri zituen, Elizondori buruz: sarrerako zubia bigarren faserako uztea, Landetako bide zaharra hestea lurrazpiko pausurik egin gabe, Mandoiturriko bidea ez zabaltzea eta Mandoiturri eta haur eskolan asotsarendako soinu panelik ez paratzea.

Zubiak bigarren faserako uzteak arazo larria suposa lezake Elizondon, gaur egun Gloria ostatuaren bidegurutzean egunero butxadurak edo auto-ilarak sortzen baitira, horregatik, zubia egin biztartean, autoak Baztan Berritik sartuko balira egoera zailduko litzateke. Hala, zubia egin biztartean Baztan Berriko adarra ez irekitzeko erabakia hartu zuen orain hilabete batzuk egin zen Elizondoko batzarrak; atzo erabakia behin behinean, aukera berriak aztertu biztartean mantentzea erabaki zen; izan ere, ondoko asteetan proposamen berriak aztertu eta batzarre bidez erabakia berrikusiko baita.

Ildo horretan, Nafarroako Gobernuko herri-lanetako kontseilaria Anai Astiz ortziralean sahiesbidea inauguratzerat etorriko da eta herritarrak protestan joateko proposamena egin zen, sahiesbidea zubirik gabe ez dela irekitzen ahal aldarrikatzeko.

Gainerakoan Mikel Ortega eta Florentino Goñi udaletxeko ordezkariak, udaletxe berria sortuz geroztik sahiesbideari buruz lana egiteko kaltetutako herrietako alkateekin, gobernuko teknikariekin eta udaletxeko ordezkariekin batzordea osatu zutela jakinarazi zuten. Aipatu zutenez sahiesbideko ibilbidean barna gabeziak zerrendatzeko eta konpontzen saiatzeko hilabetero elkartu dira. Halaber, zubiari buruz, Iparraldeko ur-konfederazioak hasierako zubiaren proposamena gibelerat bota zuela erran zuten, baina ez zutela zubirik egin ez zitekeenik erran; kontua da momentuan berean zuzendu beharrean orduko agintariek gerorako uztea erabaki zutela. Denbora honetan Udalak Nafarroako Gobernuarekin eta Uren konfederazioarekin bilerak egin ditu eta, gobernuko herri-lanetatik aipatu dutenez zubia, egitekotan, heldu den urtean eginen litzateke, nahiz hori berretsiko duen idatzizko konpromisorik ez duten idatzi nahi izan.

Gainerakoan, sahiesbidearen egitasmoaz gain, auzoko trafikoa birrantolatzeko plana egitea adostu zuten. Horretarako 2009. urtean Elizondoko Herriak egin zuen proposamena abiaraziko dute, ondoko egunetan auzoko etxe atari guztietan plan berriaren proposamenaren kopia paratuko dute. Baztango udalak ere, trafiko batzordean parte hartzerat deitu zituen herritarrak.