PRENTSA OHARRA BAZTANGO HERRI LIBURUTEGIA EGUBERRIETAN GOIZEZ BAKARRIK IREKITA EGOTEAREN ZERGATIA AZALDUZ

Data:

Baztango Herri Liburutegiko erabiltzaileendako oharra igorri du Baztango udalak kultur sailetik. Hauxe dio hitzez-hitz:
Ohar honen bidez jakinarazi nahi dizuegu abenduko hondar egunetan eta  urtarrila hasmentan liburutegia goizez bakarrik egonen dela irekita. Baztango Udala eginahalean aritu da bertako langilea  falta delarik, ordezkapenak egin ahal izateko lan poltsa egin nahian, baina Nafarroako Liburutegien Saretik ez dugu laguntzarik jaso. Izan ere, komenigarria da jakitea, Nafarroako Liburutegietako langile guztiak Nafarroako Gobernuaren eskutik daudela, ez udalaren eskutik, hortaz, beraiei dagokiei liburuzainaren ordezkoa igortzea. 

Liburuzaina ez dagoelarik (eri, oporretan…) liburutegia ireki ahal izateko lan-poltsa egin nahi genuela adierazi genion Nafarroako Gobernuko liburuzainen elkarteari, eta gai honetaz mintzatzeko Nafarroako Gobernuko Liburutegi Sareko arduradunarekin mintzatu ginen.  Berak erran zigun, oporrak ordezkatzeko ardura Udalena zela, eta nahi bagenuen Liburutegia ixtea gure esku zegoela, bertze tokietan hori egiten zutela.
Liburutegia ixtea azken aukera zenez, lan-poltsa egiteko asmoz  berriz ere Nafarroako Gobernuko Liburutegien sareko arduradunarekin mintzatu ginen 2011ko urte hondarrean, probak diseinatu eta zuzentzeko teknikari bat igorriko ote ziguten galdetuz. Erantzuna baiezkoa izan zen, baina azterketa eredua prestatzeko eta euskaratzeko astia behar zutela eta 2012an berriz deitzeko erran ziguten.
Euskaraz egiteagatik proben eguna gibelatu egin beharko zela adieraztearekin bat,  Udalak eginiko lan-poltsa horretan proba gaindituko lukeenak ez lukeela liburutegia kudeatzeko baliabiderik izanen erran ziguten (mailegu sistema, ordenagailuko klabeak…), ez baita Nafarroako Gobernuaren eskutik ariko lanean. Beraz, eta aipatutako guztiarengatik, Baztango udalak bere gain hartu du aurten ere liburuzainaren ordezkoa, baina bizi dugun egoera zein den kontuan hartuz, egun erdiko ordezkapena eginen du egun osokoa beharrean.
Idazki honen bidez, Nafarroako Gobernuaren jokaera salatu nahi dugu, eta aldi berean Baztango Herri Liburutegiko erabiltzaile zareten guztioi  gure barkamenak eskatzen dizkizuegu.