“EL BANQUETE” LIBURUAREN ELIZONDOKO AURKEZPENEAN CANEN DESAGERPENAZ ETA ESTATU ARRAZOIAZ MINTZATU ZIREN

Data:
Atzo iluntzean CANen desagerpenez eta ebasketaz mintzo den “El banquete” liburua Elizondoko Arizkunenean aurkeztu zuten. Patxi Urrutia amaiutarrak aurkezpena egin ondotik, Patxi Zamora eta Alberto Gil liburuaren egileek – Arizt Intxusta ezin izan zen etorri- hitza hartu zuten.


Patxi Zamorak liburua ez dela CANen pasatu denaz bakarrik ari aipatu zuen, batez ere, azkeneko hamabortz urte hauetan Nafarroan pasatu denaz baizik; Nafarroako elite politikoak diru eta baliabide publikoak nola erabili dituen, hori dela liburuak funtsean kontatzen duena. Halaber, azkeneko urteetan entzun ditugun dieten, oparien… kontua izozmendiaren ertza bertzerik ez dela nabarmendu zuen, hori guztiaren kostua ez dela 300.000 eurotarat ailegatzen; horren aldean, CANen desagerpena bera, 1.300 milioi euroko balioa zuen kutxaren desagerpena dela egiazki axola duena.


Egileek Elizondoko aurkezpenean erran zutenaren arabera, CANen desagerpenak Estatu arrazoiari erantzuten dio. Lizarra-Garazi garaian Estatuak, Euskal Kutxen balizko bategitea saihesteko eta Euskal Banku Publiko baten balizko sorrera galerazteko, zeina Euskal Herriaren batasunean tresna ekonomiko-finantziero handia izan baitzitekeen, Estatuko aparatuetatik abiaturiko operazioa da eta, horrela, Ricardo Martí-Fluxa, Aldo Olcese eta Alberto Alonso Ureba madrildarrak eszenan agertzen dira; horiekin bat, Nafarroako konexioaren adar gisa Antonio Catalan, Javier Taberna eta Enrique Goñi; eta horri guztiari babes politikoa emanez UPN.


Bertzalde, egileek aipatu zutenez, liburua egiten ari ziren biztartean zelatatuak izan dira eta Barne Ministerioak euren pausuak kontrolatzeko ikerketa bulego baten zerbitzuak kontratatu ditu.


Alberto Gilek erran zuenez, liburuaren helburuetako bat, 2015ean hauteskundeak etortzen direlarik eta orain artiokoek berriz boterearen segituz gero, inork deus ez zekienek erran ahal izatea galeraztea dela adierazi zuen. Halaber, akitzeko, publikotik, ustel eta zerri guzti horiek lehenbailehen lekutuarazi behar direla erran zuten.

Liburua aurtengo eguberrietarako opari ezin hobeagoa da, ez galdu aukera!: el banquete