Jon Elizetze Baztango Udaleko mendi, nekazaritza eta ingurugiro zinegotziak iritzi artikulua argitaratu du azken ttipi ttapan Biomasari buruzko zenbait gogoeta plazaratuz. Hauxe dio:
Azken
aldian energiaren aferan Biomasari buruz gero eta gehiago aditzen ari gara.
Hasteko, argipen bat: berez, biomasa, jatorri organikoko edozein erregairi
buruz aritzeko erabiltzen da, baina gure inguruan biomasari buruz ari
garelarik, normalki oihangintzako biomasaz ari gara egur-loteak, ezpalak, eta
azken aldian pelleta batez ere.
Bertzalde
energiarena herritar gehienendako oharkabeko gaia da. Gehienetan azpiegitura komunitarioen
bidez: instalakuntza elektrikoa, gasaren banaketa… Gure etxean argia, ur beroa,
sua… izaten ditugu, gibelean dagoenaz sobera pentsatu gabe. Berdin gertatzen da
lantegietan edo auto eta kamioien joanetorrietan ere. Zerbitzuaren alde
ordaindu beharrekoa ordaindu eta kitto. Herritar bezala ez dugu kezka
gehiagorik izan.
Kontua
hau da: energia bizitzako gauza guztietarako behar dugu eta sistema
kapitalistak energiaren kontsumoa, gainerako gauzen kontsumoa bezala ikaragarri
hazi du. Gainera energia kontsumo hori akituko diren gaietan oinarritu du:
petrolioa, gasa…
Baina
biomasak petrolioaren eta gasaren moduan mugak ditu. Oihan guztiak hamar urtez
errausten baditugu, ondotik ez dugu gehiagorik izanen. Hortaz, gure oihanek
hamarnaka urteetan zenbat biomasa eman dezaketen kalkulatu beharra dago eta
horren arabera ustiatu. Sinplea eta zentzuzkoa, ezta? Haatik, merkatu ekonomian
energiarena eta biomasarena negozio iturria da eta negozio eta negozio artean,
ikaragarriko aldea dago.
Hortaz,
biomasarenenean ere, herritarren eta ondotik etorriko direnen alde egiteko
erabakiak hartu behar dira, zer bai eta zer ez.
Horiek
erranik gure proposamena: udalek beren mendietako biomasa gaitasuna ongi
kalkulatu behar dute –Baztanek egin hurren du eta, ondotik, biomasa horren
tratamendua lantegi publikoen bidez edo eskualdeko enpresa ttikien bidez egin behar da, bazterrak
xehatuko dituzten enpresa monopolistiko handiak saihestuz. Hala, partikularren
eskuetan gelditzen dena: ongi egindako kalkuluen araberako oihanlanak eta
biomasa galdara eta teknologiekin zer ikusia dutenak. Energia sektore
estrategikoa da, eta administrazio publikoak horren kontrola egin behar du.
Horrela, eskualdeko udalen inbertsio ahalmena ikusita, eskualde mailako biomasa
lantegia bulkatu beharko litzateke. Ez utzi azeririk oilategian sartzen!