Diario de Noticiasen Lander Santamariak asteazken hontan idatzitakoaren harira prentsa oharra kaleratu du Baztango udalak. Halaxen dio hitzez-hitz:
SINESTEZINEKO KEINUA
Udal honen
baliabideak eta elkartasuna zalantzan paratzen duen artikulua publikatu du Diario de Noticias egunkariak, Lander
Santamariak sinatua. Horren aitzinean adierazpen eta balorazio hauek egin nahi
ditugu:
1)
Uztailaren
4an gertatutako uholdeetan udaletxearen eraikina urpean gelditu zen,
erabiltzeko arazo larriekin uztailaren 7a astelehen arte. Astelehen horretan funtzionatzen
hasi ahal izateko egokitu zen.
2)
Magnesitas de Navarra enpresaren ordezkariak mezu elektroniko
bat igorri zuen udaletxeko helbide orokorrera uztailaren 4a ortziralean, arratsaldeko
17:13an, bere makinariaren laguntza eskaintzeko. Udaletxean zegoen
egoerarengatik mezu hori ez zen uztailaren 8a artio ireki. Egun horretan berean
alkatetzari mezu horren berri eman zitzaion eta uztailaren 9an erantzun zitzaion
bere prestasuna eskertzen eta azaltzen makinekin egin beharreko lanak abiatuak
zirela bertze baliabide batzuen bidez.
3)
Udal
honek hasierako momentutik gau eta egun lan egin du Baztanera garbiketan eta
erreskatean laguntzera etorri diren instituzio, enpresa eta jende guziarekin.
Bistakoa denez, egoera batzuetan laguntza ondoko egunetan eman da eta bertze
baliabide batzuen bidez. Kasu hauetan udalak eskerrak eman die prestasuna
erakutsi dutenei eta azaldu die lan handiena egina zela eta falta zena
espezializatutako enpresen kontratazio eta administrazioaren bidez eginen
zirela.
4)
Lotsamangarria
da eta ia erridikulua komunikabide batek gertaera batzuen errealitatea
manipulatzen eta nahasten saiatzea eta hondamendi egoera bat erabili nahi
izatea gobernu talde honen irudia kaltetzeko, noiz eta talde honek bere ahalmen
guzien gainetik lan egin duenean Baztanek bere normaltasuna ahal bezain fite
errekuperatu dezan. Emaitzak agerikoak dira. Bere asmatze edo akatsekin,
bakoitzak atera ditzala bere ondorioak.
5)
Jendea
auzolanean buru-belarri aritu den bitartean, interes politikoak eta pertsonalak
alde batera utzita, tamalgarria da Lander Santamaria Baztanen egun hauetan sumatu
den elkartasun eta gizatasun giroa nahasten aritzea.
6)
Akitzeko
eskertu nahi ditugu egiazki modu positiboan erantzun duten pertsonak eta egoera
honen aitzinean maila handiko erantzuna eman duten guziak.
Esker mila
laguntzeagatik!
Baztango Udal
Gobernua