BAZTANGO UDALAK 2015EKO GERAKINAREKIN 364.000 EUROKO INBERTSIOAK EGINEN DITU

Baztango udalak ortzegun atsaldean egin zuen ohiko osoko bilkuran 2015eko kontuen likidazioaren gerakin edo erremanentea oinarri harturik hainbat inbertsio egitea onartu zuen, denera, 364.000 euroko inbertsioa. Horretarako, atzoko saioan, proiektu horiek egin ahal izateko, dagokion aurrekontu aldaketa egitea onartu zen. Hala, EH Bildu eta Ezkerrak osatzen duten gobernu taldearen proposamenak Geroa Bai eta Auzolanean babesa izan zuen (denera 9 bozka); UPNeko hiru zinegotziek abstentziorat jo zuten. Aurrekontuen aldaketa onarturik hamabortz egunez jendeen aitzinean egon beharko dute eta ondotik indarra hartuko dute. Azpiko taulan inbertsioen nondik norakoa heldu da.

Zahar etxeko sukaldea	19.000
Zahar etxeko inbertsio plana	3.000
Lekarozko eskola	27.000
Gartzaingo eskola	30.000
Brea	130.000
Almandoz U.E.	22.000
Elizetxe desjabetza	15.000
Turismoa  webgunea	2.500
Turismoa planoak	3.500
Igerilekuko toldoa	11.000
Hiltegia	7.000
Kiroldegiko aldagelak	37.500
Askak	14.000
Gorostapolo	42.500
DENERA	364.000

Taulan heldu diren inbertsioak finantzieroki bideragarriak dira eta beren gauzapenak ez du ondoko urteetako aurrekontuetan kostu gehigarririk suposatuko. Onartutakoa xehekin emanik, hauxe litzateke:

Zahar etxeko sukaldea: Francisco Joaquin Iriarte zahar etxeko sukaldearen teilatua guztiz hondaturik dago. Horren ondorioz sukaldeko sabaia zartaturik eta baldintza txarretan dago eta osasun publikoko ikuskatzaileak birritan ohartaraztapena egin du. Inbertsio honekin teilatua aldatuko litzateke eta sukaldearen barneko sabaia apaindu.

Zehar etxeko inbertsio plana:  Zahar etxeko instalakuntzak zaharturik gelditu dira eta erroko berritzea behar dute. Erabiltzaileen logelak, komunak, pasabideak… Faseka egin beharreko esku hartze handiaz ari gara finantziazio eta dirulaguntza iturri desberdinak beharko dituena. Hala, egin beharreko guztiaren jakitun izateko eta dirulaguntzak bilatu ahal izateko inbertsio plan edo memoria egitea beharrezkoa da.

Lekarozko eskola: Lekarozko gurasoek aspaldixkotik herrian eskola irekitzea galdegin dute eta, azkenean, Nafarroako Gobernuak ongi ikusia eman eta proiektua onartzea erabaki du. Alta, eskola berreraikitzea udalaren eta gobernuaren artean egiten da bakoitzaren ekarpena % 35 eta %65 dela hurrenez hurren. Hala, Baztango udalari 27.000 euro tokatzen zaio. Eskola 2016-2017 ikasturterako ireki nahi da eta lanak aurtengo udan egitea derrigorrezkoa da.

Gartzaingo eskola: Herriko eskolaren azpiegiturak arrunt zaharturik gelditu dira eta ikasleek ikasi ahal izateko espazio egokia behar dute, tartean, psikomotrizitate gela. Gartzaingo eskolan egin beharreko lanak gobernuak %65ean diruz lagundu behar zituen, baina, halako laguntzarik izanen ez denez, udalak beregain osorik hartu beharko du.

Brea: Udalaren gain dagoen Baztango errepideen sarea handia da eta horri esker auzo eta bizitokietarat komunikazioa bermatzen da. Horregatik, errepide horiek mantentzea garrantzitsua da eta horretarako beharrezkoak diren inbertsioak planifikatu eta denboran urtetik urtera egitea. Oraingoan Bagorditiko haitzetatik Orabidea artioko tartea, Elizondoko Etxaide alderakoa eta Azpilkuetako Zuaztoiko azken zatia egitea aurrikusten da.

Almandoz U.E. 1: Almandozko herrian bere garaian eskola berria eta bi familiabakarreko garapena egin zen. Bi puskatan eginik urbanizazio lanen ordainketa noren gain zen argitzeak epaitegietako bidea hartu zuen. Azkenean, auzitegiak urbanizazio lanak ordaintzea udalaren gain dela ebatzi du eta gerakinetik aipatu ordainketa egin eta gaiarekin bukatzea proposatzen da.

Elizondoko Elizetxeren desjabetza: Elizondoko plazaren gaineko aldean Elizetxea dago. Bere garaian, goitiko karrikarat ematen duen espaloiaren zatia zabaltzeko aipatu etxeari lur zerrenda desjabetu zitzaion. Espaloia zabaldurik pareta berregin behar izan zen eta lan hori etxeko nagusiek egin zuten. Oraino desjabetzaren ordainketa eta paretaren kostua ordaindu gabe egonik, behingoagatik gaia akitzea proposatzen da.

Turismo webgunea: Baztango ekonomian turismoak duen garrantzia ikusirik eta bertako baliabideak egituratu eta balioan paratzeko azpiegitura digitalek duten irismena kontuan harturik Baztango turismoaren webgunea egitea lehentasunezko inbertsio gisa aurrikusten da.

Turismo planoak: Baztanerat etortzen diren turistetako aunitzek herri-inguruetako ibilbide errazak nahi izaten dituztela ikusirik herrika ibilbide errazak eta planoak egitea aurrikusten da. Lehendabiziko esperientzia Elizondo-Elbetekoa izanen da. Ondotik, gainerako herrietarat hedatuko da eta finantziazio eskema publiko-pribatua landuko da.

Igerilekuko toldoa: Giltxaurdi kirol instalazioak bildu eta hedatzen den teilatua du material berezikoa. Teilatu hori hondatzen ari da eta bere iraupena luzatzeko toldo berezia paratzea proposatzen da teilatuaren materiala zainduko duena eta argia pasatzen utziko duena. Esku hartze hau zenbat lasterrago egin, teilatuaren iraupena denbora gehiagoz luzatuko da.

Hiltegia: Loizu hiltegiko ikuskatzaileak oraingoan neurri ttikiko hainbat proposamen egin ditu: labanak kontu eta desinfektatzeko tokia, azienden adarrak mozteko zizaila… Hortaz, inbertsio hau osasun publiko eskakizunerat egokitzeko egin beharrekoa da.

Polikiroldegiko aldagelak: Elizondon dagoen Baztango polikiroldegiko aldagelak arrunt zaharturik eta arazo desberdinekin daude. Modu horretan ur bero eta hotzaren instalazio berria eta hori kanpotik egitea  proposatzen da. Halaber, aerotermoendako instalazio guztia prest uztea.

Askak: Alkurruntz aldeko artzainek udan iturriak agortzen direlako askak eskatu dituzte. Inguru horretan  milaka ardi buru alatzen dituzte. Aska hauek agorte denboran ura izatea ekarriko dute.

Gorostapolo: Erratzuko Gorostapolo auzoko pilotalekua Baztanen dauden frontoien artean makurren eta egoera aski txarrean dago. Inbertsio honekin auzotarrendako garrantzitsua den azpiegitura publiko hau guztiz erabilgarri utziko litzateke.