Baztango Udalaren
eskariz kontzentrazio partzelarioari buruz aritzeko Gobernuko landa garapen
departamenduko teknikariek Anizerat bisitaldia egin berri dute. Bilera
asteazkenean egin zen eta teknikariez gain Juan Kruz Iriartek udaleko
nekazaritza eta herrilurretako zinegotziak eta Anizko nekazariek parte hartu
zuten.
Bisitaldian Anizko belai eta lur-eremuak ikusi zituzten eta
bide-azpiegiturak ere bai. Teknikarien erranetan Anizko baldintzek
kontzentrazio partzelarioa egitea errazten dute. Halaber, kontzentrazioaren
aurrekontua Nafarroako Gobernuak beregain osorik hartzen duela jakinarazi zuten
eta, horretarako, aurrekontua zehaztu eta onartu behar dela. Bide horretan herrian
batzarra eginen dute eta herritarrek ongi ikusten badute, Baztango Udalak
gobernuari eskaera formala eginen dio.
Kontzentrazio
partzelarioari buruzko kezka Baztanen aspaldikoa da. Legealdi honetan, udalaren
ekimenez Amaiurren mintzaldia egin zen eta ondotik, udaleko eta gobernuko
arduradunak bildu izan dira. Bilera horien emaitza bisitaldi hau izan da.
Baztango Udalak nekazaritzan ari diren nekazariendako kontzentrazio partzelarioa
interesgarria izaten ahal dela uste du eta, horretarako, Baztan osoan aldi
berean hasi beharrean, herri txiki batetik hastea hoberena dela pentsatu du.
Horregatik lehendabiziko pausuak Anizen eman ditu.