Gaurko ekitaldi xalo eta xume honekin nekazalgoan hasteko
eman duzuen pausua eskertu nahi dizuegu. Eskertu nahi dizuegu herritarrendako jatekoak egiteagatik,
ingurua zaintzeagatik eta nekazal kultura mantentzeagatik. Baztanen 30 urtez azpitik 12 nekazari zaudete, Nafarroako
mendialdeko gainerako tokiekin konparatuz gero alimaleko zifra. Alta, Baztanek
nekazari gehiago behar ditu. Horregatik, sektorea gaztetzeko eta berritzeko beharrean
azpimarra egin nahi dugu. Zeren Baztango nekazari profesionalak 233 baldin
badira, %47ak 55 urte baino gehiago baititu.
Hamarkadak dira nekazal politika desberdinek mendialdeko
nekazaritza estu hartu dutela eta gainbehera ekarri. Horri buelta eman behar
zaio eta lan-baldintza duinak eta justuak sortuko dituen nekazaritza eredua
bulkatzea ezinbertzekoa da. Eredu berria bulkatzeko gizartearekin elkarrizketa hastea
beharreazkoa da. Orain urte bat Elizondon esne sektorearen alde egin zen
manifestaldian ikusi zen bezala, herritarrek nekazaritza nahi dute. Baina
oraingo sistemarekin ezinezkoa da. Beraz, gizarte osoarekin elkarlana egitea
beharrezkoa da: herritarrek jateko onak nahi dituzte, inguru zainduak, nekazal
kultura bere zabaltasunean eta
nekazariek hori bera egiten ahal dute. Baztan nekazaritzarik gabe pentsaezina da.
Ehunka urtetan garatutako kultura, ingurua, paisaia… Horiek denak nekazaritzak
egin ditu. Hori gabe, arrantzalerik gabe kostaldeko herrien gisakoetan
bihurtuko gara: postalean.
Gainerako herritarrekin elkarrizketa horretan, nekazaritza
eta elikaduraren arteko harremana indartzea beharrezkoa da. Herritarrek zer jaten dugun, nola produzitzen den, nondik
heldu den, ze lan-baldintzetan egin den, inguruan duen eragina… jakin nahi dute eta horren parte izan ere
bai. Landa eremuak eta mendialdea
bizirik atxekitzeko galdera eta kezka horien gainean aritu beharko gara denak.
Horretarako, oraingo nekazaritza kontrolatzen duten banatzaile
handi, industria eta hornitzaileen gainetik, tokiko aliantzak indartu behar
dira nekazarien eta herritarren artekoak. Eta nekazari eta herritarrek agindu
gainerakoei zer eta nola produzituko den, rabazpideak nola banatuko diren…
Aldi berean, horri buruz lege eta dekretu zuzenak egin behar
dira. Orain berean Nafarroako Gobernua lantzen ari den nekazal ustiategien
baldintza higieniko-sanitarioen dekretuan 1.200 behi buru eta 6.000 ardi buru
artioko esplotazioak baimentzeaz ari dira. Neurri horretarainokoak utziz gero,
bistan da, mendialdean nekazaritza ezinezkoa izanen da. Horregatik, aliantzak.
Nekazarien eta herritarren artean, bideragarriak eta zentzuzkoak diren nekazal
ereduak bultzatzeko.
Gazte hasi berriak izanik gogotsu eta ilusioz egonen zarete.
Beharrezkoa da ilusio eta gogoa norberaren lanerako eta beharrezkoa da ere zuen
artean elkartu, bizi dituzuenak elkarbanatu eta elkarlaguntzeko. Elkarren berri
izatea, nekazal kontzientzia izatea eta dinamika kolektiboetan parte hartzea. Bakarka
bertzenaz bertzeak nagusitzen dira.
Akitzeko eta sobera ez luzatzeko, urtetan nekazaritzari ez
zaio baliorik eman eta bazterturik egon da, sektoreak dituen zailtasunei
guttiespen sozialarena gehituz. Ekitaldi honekin hain zuzen eta aitorpen instituzional hau eginez, nekazarien
lanaren garrantzia nabarmendu nahi dugu eta eman duzuen pausua bertze
gazteendako eredua izan dadila agertu. Iduriz, heldu den urterako bertze bi
nekazari gehiago izanen dira.
Nekazaririk gabe jatekorik ez dago, zaindutako ingururik ere
ez. Esker mila hartutako konpromisoarengatik.
Eutsi baserriari!