Baztango EHBilduk emaitza
ikusgarriak lortu ditu udal hauteskundeetan eta, beraz, bere hautagai nagusia,
Joseba Otondo, bailarako alkate izango da datozen lau urteotan.
Zer dago, baina,
emaitza ikusgarri hauen atzean? EHBilduren gaitasuna, zortzi urteotan zehar, bere planteamendu eraldatzaileak
gizarteratzeko eta baztandarrek bere egiteko.
Hauteskundeetako emaitzen inguruan, Joseba
Otondok Xorroxin irratian egindako elkarrizketa ekarri dugu gurera gaurkoan:
∎EMAITZEN BALORAZIOA
“Sekulako bozka kopurua atera dugu; ez genuke
txoratu nahi bozka kopuru horrekin, nahiko genuke bozka kopuru hori neurriz ibili,
ardura guztiarekin. EHBilduk ordezkatu nahi du langileak, nekazariak, emakumeak,
gazteak, etorkinak, herri sektore guztiak, protagonismo berri bat egituratuz,
Euskal Herriaren alde, Euskal Herria burujabe bat eraikitzeko ezkerretik, herriko
sektore sozial nagusien alde. Horretan lanean segitu nahi dugu, harrokeriarik
gabe.
∎BESTE ALDERDIEN BALORAZIOA
→Navarra Sumak zanpatekoa jaso du; iduri duenez horiek ordezkatzen zuten espazio horren aldiak Baztanen egin du
eta Baztanek beste norabide batean ibili nahi du.
→Ezkerrak aldiz, emaitza aski
onak lortu ditu, eta pozten gara, azken zortzi urte hauetan gobernu koalizioa
egin dugu beraiekin eta beraiekin batera gobernatu dugu Baztan, erabateko
elkarlanean eta erabateko leialtasunez, tarteka bakoitzak ere bere erabakiak
hartuz bi alderdi diferente garen neurrian.
→Geroa Baik bozkak
galdu ditu, eta uste dugu beharko duela pentsatu non kokatu nahi duen bere
burua; lau urte hauetan Baztan gobernuari buruz erakutsi du jokatzeko manera bat,
gogorra, eta norberak beharko ditu bereak baloratu.
∎LAU URTEOAKO BALANTZEA
Lau urte hauek gogorrak izan dira guretako; epaitegietan behin baino gehiagotan ibili izan gara, ez garelako makurtu Aroztegiaren eta botere ekonomi handien aitzinean, beti saiatu garelakoz defendatzen herritarren hitza, lekaroztarren hitza, eta gainerako herritarrena ere, horri zor gatzaizkio. Garbi dugu guk noren alde egiten dugun, baztandarren
alde eta herri sektoreen alde.
∎AURRERA BEGIRA ZER?
Aurrera begira, nik pertsonalki Ezkerrari
gonbidapena egingo nioke, beraiek ondo ikusiko balute eta programa adosturik,
elkarrekin Baztan gobernatzen segitzeko.
∎EMAITZA HAUEN ONDOTIK, BURUAN GOGOAN
Azken 50 urteotan Baztanen lanean
ibili direnak, ezagutu dutenak Baztan diferente bat, euskara maite ez zuena,
eskuindarra; baldintza makurrenetan ere beti lanean ibili direnak beti
aitzinerat; eta bestetik, espetxeetan dauden gure lagunak, adiskideak; Euskal Herriak
behar du, behingoagatik, normalizatu egoera politikoa. Espainiako estatuari
dagokio presoen eta iheslarien gaia konpontzea; lagun horiek guztiak gogoan
ditugu beraz, Euskal Herrira ekar ditzaten nahi dugu eta lehentasunezko kontua da.