(Argazkia: Juan Mari Ondikol)
Abuztu akabailan
sinaturiko hitzarmenari esker Baztanen urte luzez martxan egon den obra
hondakinen Udal zabortegia hertsi eta hondakin hauendako aukera
jasangarriagoaren aldeko bidea hartu du Baztango Udalak.
Joan den abuztuaren
29an eten zen behin betikoz Baztanen hainbat urtez zerbitzua eskaini duen obra
hondakinen Udal zabortegi edo eskonbreraren aktibitatea. Iruritako Irular
parajeko herri lur honek ia 30 urte luzez jaso izan ditu obra hondakinak.
Lehendabiziko 10
urteetan Marmoles de Baztan SA enpresak sorturiko hondakinak isurtzen ziren
hemen eta ondotik eta aipatu bezala, joan den abuztu akabaila arte, inguruko
obra guztietakoak.
Zabortegi hauek ez
dute gaur egungo legedia betetzen eta Udalak azken urteak itxiera planifikatzen
eta bailarako obra hondakinendako irtenbide jasangarriagoak bilatzen jardun du.
Pausu berri honekin,
ekonomia linealeko eredutik (natur baliabideak ustiatu, erabili eta hondakin
bihurtzean lurperatu) EKONOMIA ZIRKULARRERAKO (hondakin izan behar ziren horiek
berriz ere produktuetan bihurtu eta ekonomiaren zikloan sartu) urrats berri bat
eman du Baztango Udalak.
Udal obra
zabortegiaren itxierarekin batera eta hau ordezkatuz obra hondakinendako transferentzi
eta
tratamendu planta bat (kasu honetan pribatua) jarri da martxan Baztango
herri lurretan.
Oronoz alderdian
Baztango herri lur batean kokaturik dagoen harrobi bateko instalazioak eta aktibitatea
probestu eta sinergiak sortuz obra hondakinen transferentzi eta tratamendu
planta baten sorrera ahalbidetu da.
Oronozko Askape
harrobia ustiatzen duen enpresak duela urte batzuetatik hona ez du harririk ateratzeko
baimenik eta beren aktibitatearekin jarraitu ahal izateko Iruñerritik ekartzen
dute harria, horretarako kamioiak Baztandik hutsik joan eta harriz beteak
itzultzen direlarik.
Instalazio horietan
bertan berriki martxan jartzea ahalbidetu zaien aktibitate osagarriari esker, obra
hondakinak jaso eta hemen tratatu ezin direnak Iruñera egiten dituzten
bidaietan eramaten dituzte (han dauden tratamendu planta ezberdinetara).
Eskonbro garbiarekin
aldiz, Askapen bertan dituzten harri matxakadorak probestuz tratatu eta 2.
Mailako materiala edo material birziklatua lortzen dute, zikloa itxi eta
Baztanen bertan edo inguruetan erabili ahal izateko agregakin birziklatua
lortuz.