Azaroak 6an,
datorren asteazkenean, izanen da Euskaraldiaren prestakuntza saioa,
arratsaldeko 19:00etan, Arizkunenean.
Euskaraldia, hizkuntza-ohiturak
aldatu eta ahal den guztietan euskaraz
egiteko helburua duen ekimena, azaroaren 23tik abenduaren 3ra eginen da. Euskal
Herri mailako ariketa izaki, eskualdeko herrietan ere bat egin dute. 11 egun
horietan, 16 urtetik goitiko herritarrek ahal den guztietan euskaraz egitea nahi
da, lehenbiziko hitza euskaraz egitea, alegia, euskaraz jakin eta ulertzen
dutenekin euskaraz aritzea eta ulertzen dutenek horretarako bidea zabaltzea.
Ariketa horretarako
bi rol sortu dira Euskaraldian: Ahobizi
eta Belarriprest. Euskaraz ongi moldatzen dena eta euskaraz ulertzen duten
guztiekin euskaraz eginen duena Ahobizi izan
daiteke, baita ezezagunei lehenbiziko solasa euskaraz eginen diena ere.
Belarriprestak, berriz, euskaraz
ulertu bai, baina solastatzeko gai sentitzen ez direnak izan daitezke, baina
beraiei euskaraz egiteko aukera emanen dutenak, nahiz eta beraiek erdaraz edo
euskaraz erantzun.
Baztanen 2017ko
udazkenean hasi ziren Euskaraldia prestatzen eta, denbora honetan, Euskaraldia
jendarteratzeko jarduera aunitz egin dira: aurkezpen saioa, tailerrak, udako
kanpaina… Orain, 11 egun horietan ahalik eta gehien euskaraz bizi eta mintzatzea
tokatzen da. Izan zaitez zu ere Ahobizi edo
Belarriprest!!!