Tokiko elikaduraren inguruan esperientziak trukatuz



Elikadura iraunkorrak osasunean eta lurraldearen egituraketan duen garrantziaz eztabaidatuko du Baztango ordezkaritza batek bertze 15 udalerritako ordezkariekin, azaroaren 21-23ra bitartean, Murtzian eginen den Agroekologiaren Aldeko Hirien sareko III.urteroko Batzar Nagusian. Biltzarraren gaia “Tokiko elikadura iraunkorra, jendeendako eta lurraldearendako osasuntsua”  da eta Murtziako  Unibertsitateko Merced  Campusean  eginen da. Bertan Baztango Udaleko gizarte teknikari batek parte hartuko du eta estatuko bertze 15 udalerrirekin esperientziak elkar trukatuko ditu.

Aurtengo udaz gero Baztanek Agroekologiaren Aldeko Hirien Sarean parte hartzen du, tokiko bertze erakundeekin estatuko eta Europako markoan baliabideak eta esperientziak elkarbanatzeko. Sarea biziki lagungarria da elikadura iraunkor eta osasuntsuari buruz udalean abian diren ekimenak laguntzeko.

Sarea 2017tik Zaragozako eta Valentziako udalek bulkatu dute eta “Entretantos” eta “Daniel eta Nina  Carosso” fundazioek laguntzen dute, lehenak laguntza teknikoa emanez eta bigarrenak finantziazioan. Sarea eratu eta urte batera dagoeneko 17 udalek parte hartzen dute bertan eta tokiko elikadura iraunkor eta osasuntsuaren alde egiten du. Hauek dira parte hartzen duten udalak: Aínsa, Baztan, Córdoba, El Prat de Llobregat, Fuenlabrada, Godella, Granollers, Huétor-Vega, Madrid, Meliana, Murcia, Navás, Iruñea, Rivas-Vaciamadrid, Valencia, Valladolid, Zaragoza.

Prentsa agerraldiaren ondotik Sareko Batzar Nagusia eginen da eta bertan zuzendaritza berria hautatzea aurrikusten da, 2020ko laneko plana onartu bidenabar.  Kide diren erakundeetako ordezkariekin esperientziak trukatuko dira, heldu den urteko “Osasuna eta elikadura eskubidea” kanpainaz mintzatuko dira, kide berrien atxekimenduaz eta elikadura politikak estatuko markoaren agendan txertatzeaz. Sarean ordezkatuta dauden aukera politikoen aniztasunak aukera ona ematen du horretarako.

Sareko batzarrarekin bat, ortzegunean, azaroaren 21ean, arratsaldean, Sareko Erakunde Sozialen Kontseiluko bilkura eginen da: elikadura iraunkorrarekin engaiatutako erakunde sozial eta profesionalen biltzarra hain zuzen. Helburua da elikadura politika iraunkor eta osasuntsuen koprodukzioan eragile sozialen ardura zein den eztabaidan sakontzea.

Ortziralean, azaroaren 22an, Sareko Batzarra osatuz jardunaldi teknikoa eginen da eta bertan murtziarrek eta Sareko kide ez diren edozein lurraldeko udalek eta erakundek parte hartzen ahalko dute

Goizean mikroponentziekin hiru gune izanen dira: elikadura gobernantzaz, agroekologia ekintzailetza aholkularitzaz eta elikagaien banaketarako tokiko sareetaz aritzeko. Ondotik Sareko oraingo lan-taldeen bilkurak eginen dira (erosketa publiko iraunkorra; osasuna eta Elikadura Eskubidea, Udal ttikiak eta Udalez gaindiko erakundeak; eta ikerkuntza). Azkenik, eztabaidarako tarte zabala izanen da. Gaur egun Baztango Udalak osasuna eta Elikadura Eskubidea lan-taldean parte hartzen du eta laster Udal ttikien eta Udalez gaindiko erakundeen taldean hasiko da.

Atsaldean, bertzalde, hiru mintzaldi izanen dira: Komunikazioa eta agroekologia; Elikadura, eraldaketa sozialerako zeharkako gaia eta Murtziako udalaren sustapen agroekologirako planari buruzko, aurkezpen horrekin hain zuzen, akituko da aurtengo batzarra.