BAIONA, TRANTSIZIO EKOLOGIKO ETA EKONOMIKORAKO ALTERNATIBEN HERRIXKA

Atzo Baiona aldaketa klimatikoaren aurkako ekimenen eta jendeen herrixkan bihurtu zen, alternatiben herrixkan hain zuzen. Modu horretan, baztandar batzuk ere harat hurbildu ziren Euskal Herrian eta kanpoan trantsizio ekologikoaren ikuspegitik egiten ari diren iniziatiba desberdinak ezagutzeko. Eguneko ekitaldi guztiak ezin aipatu, hortaz, eguerdian, Iñaki Angituedadek errandako moduan Hegoaldeko tenorean eta atsaldean, Iparraldekoan Euskal Herriaren desafioak birmoldaketa ekologikoa, elikadura burujabetza eta trantsizio energertikoaren aitzinean mahai-inguruari buruz solas batzuk bertzerik ez ditugu eginen.
Mahai-ingurua aski interesgarria izan zen; bertan, dagoeneko aipatu dugun Iñaki Antiguedad EHUko hidrogeologiako katedraduna eta ezker abertzaleko kidea, Joseba Azkarraga soziologoa eta trantsitzioari buruzko ikerlaria eta Amaia Muñoa ELA sindikatuko idazkari nagusi ordea mintzatu ziren.

Hiruek bat egin zuten krisiaren izaera sistemikoaz aritzerakoan, hau da, krisi ekonomiko-finatzieroaz harago, sistema osoaren krisiaz ari garela  nabarmentzerakoan: energetikoa, klimatikoa e.a. Modu horretan, sistema aldatu behar bada, nolabaiteko trantsizioa antolatu beharra dagoela ere aipatu zuten. Horretarako, Iñaki Antiguedadek diagnostiko zorrotzak behar direla aipatu zuen; horren gainean etorkizun posible bat irudikatu (ze lanpostu, sektore produktibo…) eta horretarako ze bide-orri proposatzen dugun adostu. Iñaki Antiguedadek ere ideien eztabaida azpimarratu zuen, iraunkortasuna, demokrazia edo bertze edozeri buruz ari garelarik zeri buruz ari garen ongi zehaztea. Joseba Azkarragak, bertzalde, trantsizio ordenatu baterako dauden zailtasunak aletu zituen, orain artio mugimendu eraldatzailean egon diren hainbat proposamenen kontradikzioak aipatuz: ongizate estatua adibidez, zeina neurri batean hegoaldeko herrialdeen arpilatzean oinarritzen baiten. Betiere, Euskal Herrian trantsizio klabean, nahiz batzuetan ohartu gabe, ari diren ekimenen loraldia bizitzen ari garela aipatu zuen, herrigintza biziberritzen ari dela tokiko esperientziak bulkatuz, komunitatea mobilizatuz, eraikuntza klabe ofentsibo eta sortzailean. Modu horretan burujabetza kontzeptua bera aberasten ari da, burujabetza politikotik harago energetikoa, elikagaiena… ere aipatuz eta horretarako tokiko dinamikak piztuz. Halaber, ekimen horiei guztiei buruz solastatzeko uneak eta guneak behar direla azpimarratu zuen.

Akitzeko Amaia Muñoa ELA sindikatuko idazkari nagusi ordea aritu zen. Bere diskurtsoaren ELA sindikatuari buruzko zati proselitista kenduta, sindikatuaren ingurumen sailak ekologia trantsizio ekonomikoari buruz argitaratu duen Floren Marcellesiren liburuaren hainbat ondorio aipatu zituen. Hala, trantsizio ekonomiko-ekologikorako gizarte eta kultura aldaketa behar dela azpimarratu zuen eta horretarako eztabaida demokratikoa ahalbidetu behar dela, parte hartzea e.a. Bertzalde, lurraldeka eta sektoreka ere planifikazio parte hartzailea egin behar dela edo epe luzeko behar bezalako politika publikoak eta lanaren eta aberastasunaren banaketa behar direla; horretarako guttieneko eta gehinezko soldatak finkatu behar dira, oinarrizko errenta unibertsala ezarri eta zerga politika zuzenak.

Ezin aipatu gabe utzi atsaldean Motive-es Okzitaniako Tolosako taldeak eskainitako kontzertu ikaragarria. The Clash taldearen Police and thieves kantaren bertsio zirraragarria eskaini zuen.