Prentsa ohar abten bidez Baztango EH Bilduk Baztango Geroa Bairen jarrera kritikatu du, Baztanen alferreko tentsioa sortzen dutela, Aroztegiako gaiari bide demokratikoa ez ematean tematuak. Zentzutasuna eta neurrizkotasuna eskatu diote.
Geroa Baik Aroztegiko gaian duen itsukeri eta temazukeria ez
da ulertzen ahal. Gaiari zentzuzko konponbidea eman beharrean, demokrazian
sakondu beharrean, kaskarturik ageri dira, baztandarrei hitza emateko
entzungor, Baztanen alferreko tentsioa sortuz. Baztango EH Bilduk koalizioko
eta gobernuko arduradunei arduraz jokatzeko deia egin nahi die, ez dezatela
tenkatzen segi, arrazoibidez aritu daitezela, inposizioak utzi eta herritarrei
galdetzeko aukera eman dezatela.
Alta, legealdia hasiz gero, Geroa Bai modurik axolagabeenean
ari da: abuzturako oraingo EH Bilduren alkatea gaitzesteko mozioa bideratu zuen,
Batzar Nagusiaren erabakia betez gobernuaren aitzinean PSIS gelditzeko
errekerimendua aurkezteagatik; bilkura berean, Garbiñe Elizegi lehengo
alkateari, proiektua pelotazoa zela
errateagatik Palacio de Aroztegia
promotorak paratutako salaketaren eta 30.000 euroko kalteordain eskaeraren
aitzinean, babesa ez ematea erabaki zuten. Urte zahar bezperan gobernuak PSIS
iruzurtia gelditzeko eskatuz Batzar Nagusiak egindako eskaera ez onartzea
erabaki zuen eta, gehiago ez luzatzeko, azkeneko Batzar Nagusiaren aitzinttoan,
gai-ordena hetsirik zegoela, Nafarroako Gobernuak inork eskatu gabe eta inon
onartu gabeko galdeketari buruzko txostena igorri zuen. Horren guztiaren ginda
aipatu Batzar Nagusian Geroa Baiko zinegotzia galdeketaren aurka agertu zen
bakarra izan zela, 21 batzarkide alde agertu baitziren eta 6 abstentzio. Eta,
hori, oraingo alkatearen kontrako gaizki erran guztiak ez aipatzeagatik.
Zentzuzkotasuna eta neurrizkotasuna eskatzen dugu.
Demokrazia gehiago eskatzen dugu. Baztango etorkizuna baldintzatuko duen
horrelako proiektuari buruz herritar guztiek iritzia emateko eskubidea
aldarrikatzen dugu. Hala, Lekarozko herriaren eskuzabaltasuna aitortu nahi
dugu, zeren kaltetutako herria beraiena izanagatik eta 2009an egindako
galdeketan proiektuaren aurka agertuagatik, joan den otsailean galdeketa Baztan
guztian egiteko erabakia hartu baitzuten.
Nahiz Geroa Bai bazterrak nahasten saiatu eztabaidaren muina
erraza da: inposizioa edo herriari galdegitea. Geroa Bai non dago?
Aroztegia, herri galdeketa orain!