2018/02/24

ASTE HONTAN AGROEKOLOGIA ESKOLAK AURKEZTU DITUZTE


Agroekologia eskolak antolatu dituzte Hazitik Hozie elkartea eta Baztango Udala elkarlanean eta horren aurkezpena egin dute aste hontan. Aitor Azkarate eta Joseba Otondo antolatzaileen izenean solastu ziren, xehetasunak emanez:

AITOR AZKARATE (Hazitik Hozie)
Bigarren urtez, Baztango Agroekologia Eskola Herritarra eginen dugu Baztanen, eta gaur, 2018ko egitaraua aurkeztuko dugu. Eskola honen helburua herritarrak agroekologiarat hurbiltzea da. Agroekologiak etorkizuna erran nahi du. Agroekologia jaten dugunaz kezkatzea da, jatekoak produzitzeko teknika eta moduetaz ardura hartzea, lan-harreman eta bizi-baldintza justuak bulkatzea, ingurugiroa eta osasuna zaintzea, landa-eremu bizien alde lana egitea. Gaur egun nagusi den produzitzeko eredu industrial eta intentsiboarekin nekazariak hankapean hartzen dituzte, kontsumitzaileak jateko eskasekin  bazkatzen, landa-eremuak desegituratu eta husten; ingurunea pozoitzen. Bizia maite dugulako, eredu aldaketa bulkatu beharra dago, agroekologiaren bidea ibili.
Ildo horretatik,iaz, Baztango zortzi elkarte eta erakunderen ekimenak koordinatu eta Baztango Agroekologia Eskola Herritarraren izenburupean egitarau bateratua eskaini genuen. Ekitaldi desberdinetan 120 herritarrek parte hartu zuten. Alde horretatik, bai edukietan bai parte hartzean balorazio positiboa egiten dugu.
Aurten elkarte eta erakunde gehiagok parte hartuko dute eta eskaintza ia osorik berritu ahal izan dugu; agroekologiaren aukerak mugagabeak direnaren erakusle. 2018ko egitaraua hauxe duzue:
  • Baratzeko haziak prestatzeko ikastaroa Otsailaren 24an, Oronozko batzartokian, 10:00tatik 12:00tara. Irakaslea Ruth Peña baratzezaina
  • Haziaren eguna Martxoaren 10ean, aurtengoa Zigan. 11:30tan hazien trukea eta 12:30tan Jakoba Errekondorekin mintzaldia
  • Solasaldia: Glisofatoa-Rondup, inguruaren pozoiketa eta jendeen minbizia Martxoaren 22an,  Elizondon, Arizkunenean, 19:30tan. Elean Paul Bengoa EHNEko teknikaria
  • Bertako zuhaitz espezie eta barietateak ezagutzeko ibilaldia Martxoaren 24an, Berroetan, 9:00tan; gidaria: Xabier Zabaleta
  • Garagardo ekologikoa egiteko ikastaroa Apirilan, Aise elkartean, Elizondon
  • Gasnagintza ikastaroa Maiatzaren 12an, Elizondon, Autxitxia gasnategian. Irakaslea Ramon Agirre
  • Larraldea sagardotegi eta sagardi ekologikorat ateraldia Ereiaroan, Lekarozen. Gidaria: Jesus Angel Garcia
  • Asteburu mikologikoa Buruila-urrian. Ibilaldia, erakusketa eta dastaketa. Elizondon
  • Inguruen izenak eta toponomia ezagutzeko ibilaldia Urrian Antzanborda-Berro aldean, Elizondon. Azaroan Aniz inguruan.
  • Zerri mondonga ikastaroa II Abenduan. Aurten patea, saltxitxoia eta odolkiari buruz. Irakaslea Lorentzo Sarratea
  • Ogi ekologikoa egiteko ikastaroa. Abenduan. Irakaslea Xabier Akizu.

Antolatzaileak berriz:  Hazitik hozie, EHNE,  Lekarozko Legate elkartea, Elizondoko Aise eta Erlategi elkarteak, Berroetako Gure ametsa elkartea, Anizko Mendiarte elkartea, Anizko herria, Zigako herria, Berroetako herria, Elizondo herria eta Baztango Udala.

 JOSEBA ORONDO (Baztango Udala)

Baztango agroekologia eskola herritarrak helburu dibulgatiboa du, herritarren kontzientzia piztekoa. Baina ez dugu horretarako bakarrik sortu.  Eskolaren nahia helburu handiagoetarako aukerak sortzea baita, eta  hori argi eta garbi, eskualdeko lanbide heziketa  ikastetxe berrian euskaraz emanen den agroekologiako erdi zikloa eskaintzea da. Hortaz, gaurko eguna eskakizun hori mahai gainean paratzeko eta publiko egiteko aprobetxatu nahi dugu. Eskualdearen garapenerako  agroekologiako formazioa estrategikoa baita. Heziketa horrek gainera Baztanen gaurgero abian diren proiektuekin bat eginen luke: etxalde agroekologikoak, ziurtagiri ekologikoa duten bazkaleku komunalak eta udal hiltegia, agroekologia eskola herritarra bera…

Nekazal politikek nekazal sektorea errekarat eraman dute eta desagertzeko bidean paratu. Eredu intensibo, industrial eta produktibistak baserriak hankaz goiti igorri ditu. Iaz Danone eta eskualdeko baserriekin pasatu zena argigarria izan da. Erne ez bagabiltza, etzi iratzartzen garelarik, inguruetan nekazaririk ez dugula ikusteko arriskua izanen dugu. Egun hori etortzera ez da uzten ahal. Egun horrek gure jatekoak produzitzeko ahalmenik gabe gelditu garela erran nahiko baitu, eta zernahi jatera behartuak izanen garela; gure mendi eta bazterrak sasiak hartuko dituela, nekazarien jakitatea eta kultura galdu dela eta, seguru aski, auzo eta herri ttikiak hustu direla. Etorkizuna nahi dugulako eta etorkizun zuzen eta hobeagoa, jatekoak bertan produzitu behar direla uste dugu; jatekoak produzitzen dituzten nekazariek soldata duinak eta lan-baldintza onak behar dituztela, gure ingurua zaindu behar dugula pozoindu gabe eta auzo eta herri ttikiak bizirik atxeki behar ditugula. Horretarako Ipar Euskal Herriko nekazariek aldarrikatzen eta egunero lantzen duten nekazaritza herrikoi eta iraunkorra behar dugu eta agroekologia ere bai. Jatekoak ez dira industria eta banatzaile handien eskuetan gelditzen ahal, herritarren eta nekazarien eskuetan egon behar dute.

Horregatik, bigarren urtez eginen dugun Baztango Agroekologia Eskola Herritarren aurkezpena,  eskualdeko lanbide heziketa ikastetxe berrian agroekologiako erdi zikloa eskaintzeko eskatzeko baliatu nahi dugu.

Gaurgero arduradun desberdinei eskakizuna jakinarazi zaie. Denen artean posible da.