Udalarena 8.048.268
eurokoa da, Baztan udal ikastolarena 690.666 eurokoa (udalaren gain 54.000 euro)
eta zaharretxearena 135.508 eurokoa. Baztango
aurrekontu bateratuaz gain, Giltxaurdi enpresa publikoarena ere onartu dute
429.446,28 eurokoa.
Otsailaren 28 arratsaldean
Baztango Udalean egin zen ohiko osoko bilkuran 2019. urteko aurrekontu
bateratua onartu zuten EH Bilduren, Ezkerraren eta Baztan Auzolanean aldeko 7
bozkekin eta UPNren eta Geroa Bairen aurkako 6ekin. Aurtengo aurrekontuak
azkeneko urteetakoen ildoan heldu dira, gastu arruntaren egitura bertsuarekin eta
zorra jaitsiz mozketa sozialik egin gabe.
Udalaren zorrari
buruz, preseski, 2019ko urtarrilaren 1ean 4.282.431,97 eurokoa zen, sendotutako
sarrera arrunten %56,15ekoa, legeak paratzen duen %110eko mugaren azpitik eta
2011. urteko %130etik urrun; urte horretan zorra 9.700.000 eurokoa zen. Onartu
berri diren aurrekontuen arabera, urtearen hondarrerako zorra 3.791.831,97
eurokoa izanen da.
Bertzalde, gastu
arruntaren atala berdintsu mantentzen da, nahiz langileen ordainsarietan izan
diren iganaldi desberdinengatik eta plantillan sortu den administrari ofizial
postu berriarengatik pixkat igan, %3,12.
Modu berean,
sarrerak handitu dira, batez transferentzia arrunten funtsa handitu delako,
kasu honetan %4,89, hain zuzen.
Aipatutakoaren
ondorioz Baztango Udalak 1.480.700 euroko inbertsio atala osotu du; udalaren
gain 378.400 euro eta gainerakoa tokiko inbertsio planaren bidez, erabilera
askeko funtsaren bidez eta dirulaguntza deialdi desberdinen bidez finantziatuko
da.
Diru kopuruari
buruz inbertsio garrantzitsuenak Zuaztoi eta Azpilkuetako saneamenduen, sareen
eta zolen berritzea izanen da, 365.450 eta 196.100 euro hurrenez hurren.
Bertzalde, 2015eko otsaileko erauntsiek hondatutako Sumutsuako eta Urruxkako
bideak konpontzeko 79.000 eta 40.850 euro berezi dira. Lan guzti hauek 2018eko
kontuak hetsi artio, maiatzan ez dira hasten ahalko. Bideekin jarraikiz,
Iruritako ezkerreko errekako eta Erratzuko Larretako bide nagusiak breaztatuko
dira, 115.000 euro. Errepide hauek auzotarren eguneroko bizimodurako oinarrizko
ardatzak dira. Bideen mantenimenduarekin loturik sasiak mozteko makina berria
erosiko da eta, horretarako, 18.150 erabiliko dira.
Azkeneko
urteetan, bertzalde, uda sasoian Arraiozen izan duten ur eskasia saihesteko
46.000 euroko inbertsioa eginen da, Iruritako ur-biltegik hodia paratzeko.
Halaber, 2014ko uholdeek hondatutako Giltxaurdi futbol belagia konpontzeko
220.000 euroko inbertsioa eginen da; udalak bere gain 70.000 euro hartuko du.
Astero, aste egunez, 380 gaztek erabiltzen dute aipatu futbol belagia.
Gainerakoan
haurren parkeetarako 12.100 bideratuko dira eta Elbeteko plaza zolaberritzeko
30.000 euro. Halaber eskoletako lanetarako 30.000 euro eta hondakin organiko
sortzaile handiendako konpost ontziak erosteko 57.000 euro. Mendiko lanetan,
berriz, 155.000 euroko inbertsioak eginen dira eta udaleko informatika sarea
berritzeko 35.000 eurokoa.
Azkenik Bagordiko
bide bazterreko zulokak edo kunetak betetzeko 9.500 euro.
Gainerakoan
Nafarroako Parlamentuak Amaiurko gazteluaren bisitarien harrera gunea egiteko
250.000 euroko dirulaguntza izenduna eman du eta Oronozko pilotalekua
moldatzeko 17.500 eurokoa.
Geroa Bairen emendakina baztertua eta EH Bildu eta
Ezkerraren mozioa onartua
Aurrekontuen
eztabaidan Geroa Baik desfribiladoreak eta lifeVACak erosteko 8.000 euro eta
herrien artean 4.000 euro gehiago banatzeko emendakina sartu zuen. Alkateak
erran zien otsailaren 22an egindako ogasun batzordean aurkeztu izatera –aurrekontuen
txostenak otsailaren 15erako banatu zitzaizkien- emendakina bideragarria izan
zitekeela, baina hondar momenturako utzi zutenez, aurrekontuen tramitazioa
gibelaraziko zutela; horregatik EH Bildu, Ezkerra eta Baztan Auzolaneanek
emendakinaren kontra egin zuten eta ez zen onartu. Nolanahi ere, EH Bilduk eta
Ezkerrak udaltzainen autorako desfibrilagailua eta jangela duten eskoletarako
LifeVACak erosteko premiazko mozioa sartu zuten, denera 2.500 euro. Mozioak
alderdi guztien babesa izan zuen eta aurrekontuen tramitazioan ez du eraginik,
behin indarrean dela aurrekontu moldaketa bidez bideratzen delako.