Bizitza antiojo moreekin ikusten ikasteko



Baztango Talde Feministak antolaturik, hemen duzue Feminikasten 2.0 egitasmoa, igorri diguten prentsa oharrean bildutako mezuaren arabera:   

"Aurten, bigarrenekoz, FEMINIKASTEN antolatu dugu. Bizitza antiojo moreekin ikusten ikasteko hilabetero solasaldi, proiekzio, tailer edo erakusketa bat izanen dugu Baztango xoko desberdinetan.

2019-2020 ikasturteko lehendabiziko hiruhilekoan 3 saio izanen ditugu, bat hilabeteko. Saio bakoitzean gai desberdin bat landuko dugu, bet ere feminismoarekin harremana izanen duena. Lehendabizikoa irailaren 27an izanen da. Zauria(k) proiektua aurkeztera etorriko zaizkigu egileak. Arizkunenea kultur etxean izanen da, Elizondon arratsaldeko 19:00etan. Zauria(k) proiektua, eromena, ezinegona eta osasun mentala ikuspegi feminista batek lantzen duen dokumentala da, sufrimendu psikosoziala eta genero bizipenak uztartzen eta 9 emakumeren errealitateak barne hartzen dituena. Dokumentala proiektatu ondotik honen inguruko solasaldia edukiko dugu egileekin.

Bigarrena urriaren 19an izanen da. Lehengo urteko arrakasta ikusita aurten ere horren beharrezkoa dugun autodefentsa feminista tailerra izanen dugu. Egun osoko tailerra izanen da, goizean 10:00etan hasiko da eta arratsaldean 16:00etan. Tailerrean parte hartu nahi dutenek posta elektroniko bat bidali beharko dute baztangohaizefeminista@gmail.com helbidera. Tailerra EMAGINen esku izanen da

Hirugarrena eta hiruhilekoa akitzeko “Euskara eta feminismoa: genealogiatk egungo erronketara” hitzaldia ematera Saioa Iraola etorriko zaigu. Gaur, euskalduntasunaz eta feminismoaz ari gara plazetan, baina zer nolako bidea egin izan dute elkarrekin? Zein da lotura horren genealogia posible bat? Gaur egun, elkartzen ote dira bi bide horiek? Hitzaldi honetan hainbat elementu zein hari mutur josten ahaleginduko da hizlaria, atzokoaz, gaurkoaz zein biharkoaz: emakumeez aritu, atzoko komunitate femeninoez eta gaurko komunitate feministez. Genealogiaz, elkarguneez, bidegurutzeez, gatazkez eta erronkez. Eta azkenik, hainbat ondorio eta galdera partekatzeko aukera izanen da".