Gaurtik aurrera
martxan da Errigorak Nafar hegoaldeko uzta eskutik eskura kanpainaren edizio
berria. Oraingoan, Nafarroa hegoaldeko oliba-olio birjina, kontserba-sortak,
arroza eta pasta eskainiko ditu, euskaraz etiketatuta eta ekoizleek saltzen
duten jatorrizko prezioan.
Otsailaren 27tik
martxoaren 12ra arteko epea izango da eskaerak egiteko, eskuorriak betez
jarraian aipatzen diren lekuetan: Zubi Punta eta Dolaetxe ostatuetan; Fantxike
eta Kattalingorri-Zangue dendetan. Eskaera egitean ordaindu behar da.
Bilketa berriz, Kattalingorri-Zanguen
eginen da: olioa (apirilak 2-7) eta kontserbak berantago: (maiatzaren 21-26). Dena batera eskatu arren, bi txandatan jasoko
dira beraz, elikagaiak.
Errigoraren
webgunearen bidez ere egin daiteke eskaera: www.errigora.eus/eskutik-eskura-2020
helbidean.
Kanpaina honetako
eskaintzaren barruan honako produktu hauek egongo dira aukeran: oliba-olio
birjina estra, pikillo piperrak, zainzuri zuriak, orburuak, barazki-menestra,
tomate frijitua, arroza, potxak, barazki-kremak eta pasta.
Aurtengo kanpainan
16 ekoizlek hartuko dute parte: Nafarroa hegoalde eta erdialde zabaleko bost
olio-errotak, bederatzi kontserba-etxek eta arroz-ekoizle eta pastagile banak.
Urtez urte, kontsumitzaileen kopuruarekin batera, ekoizleen familia ere haziz
doa.
Aurreko edizioetan bezala,
Errigoraren kanpainan batzen duten diruaren parte bat Nafarroa hegoaldeko
euskalgintzarentzat izango da.
'Gure hautuez
harro' da aurtengo kanpainaren leloa. "Harro baikaude gure ekoizteko eraz,
gure kontsumitzeko eraz, herria egiteko eraz", aipatu dute Errigorakoek.