Iban Iparragirre: "Esnatzen gara orain edo gureak egin du"



Nola heldu gara hona? Saguzarrek dute errua?

Nire iritziz, korbata daramaten saguzarrak dira guzti honen arduradunak. Ez dut segundu batean ere sinesten, nahigabe gertatutako gauz bat izan dela.

Nire iduriz aspalditik mundu huntan libratzen ari den mundu botere ekonomikoaren eskuratzeko estrategiaren barnean sartzen da hau. Nolabaiteko “reset” bat egiteko beharra. Horren ondorioz langileen baldintza prekarizatuagoak, arlo guztietan gure eskubideak oraindik murriztuagoak, gizakiaren kontrol gehiago, etab … etorriko zaizkigu.

Gerran gaude?

Argiki bai, eta ikusi beharko da ze panorama gelditzen zaigun guzti hau pastu ondotik. Baina gehien kezkatzen nauena da prest gauden eta borondatea dagoen gainerat heldu zaigunari behar den bezala aurre egiteko. Borrokak oso epe luzean neurtu behar dire, baina edo esnatzen gara orain edo gureak egin du.

Zein eragin izaten ari da, pertsonalki?

Hilabete bat lanik egin gabe ibili naiz, baina apirilaren 14ean berriz hasi ginen. Gainera herri ttiki batean bizi naiz, etxe batean, eta egunero tartetxo batez baratzerat ateratzen naiz haize pixkat hartzerat. Makurrago zaudete blokeetan eta hirietan bizi zaretenak.

Bertze aldetik indar okupatzaileen presentzia eta kontrola izugarri haunditu da. Zinez nazkagarria da!

Pandemia honek denoi berdin eragiten digu?

Momentuz baietz erranen nuke, baina ikusi nahi dut hemendik denbora baterat nola gelditzen den guzti hau, zentaz susmoa dut, beti bezala, azkenean gehien pairatuko dutena hau, guttien dutenak izanen direla.

Gainera elkarrizketa hau baliatu nahiko nuke, espetxean ditugun lagun eta senideak gogorat ekartzeko. Mobida guzti hau sortu aitzin berezkoa ezarrita zitzaien neurri zorrotzak, orain zorrotzagoak jarri dizkietelakotz, bizi baldintza kaxkarrak muturreraino eramanez. Nire partetik beraientzat doa nire maitasun eta indar guztia!!!!!

Jardun esentzialek, gehienek, emakume aurpegia dute. Zer adierazten du horrek?

Bai horrela da, eta bertze behin ere erakusten du zein garrantzitsua den emakumea gure gizartean. Emakumeari merexi eta dagokion tokia emateko unea heldu da, eta nik uste poliki poliki eta tinko atxikiz bide onetik goazela.

Baztanen zer egoera uzten ari da pandemia?

Ni Zugarramurdin bizi naiz, beraz Baztango berriak lagunen bitartez jasotzen ditut.

Baina pentsatzen dut komertzioen, langileen, etab … egoera oso zaila izan behar dela. Beldur naiz hunen ondorioz etorriko den egoera prekarioaz patronalak probextea langilegoak gehiago zanpatzeko.

Aldiz Zugarramurdin kezkagarriena komertzioen aferan apartez, da kolore guztietako indar okupatzaileak askatu dituztela kaleetatik. Nik adibidez Iparraldean lan egiten dut eta egunero Dantxarinetik pastu beharra naiz hoien aintzinetik. Badirudi kolpez 40 urte atzera egin dugula.

Baztanen nola egin aurre pandemiari?

Elkarturik … ez dago bertzerik. Borroka guztietan bezala elkartuak egotea da gakoa.

Gizarte hiperkonektatu baten aztarnak ugaritu dira. Interneten topatuko al dugu elkar?

Elkarrizketa hau egiteko bai … baina ni eta internet ez gara sobera lagun.

Argi dago gaur egun internet, sare sozialak, etab … eguneroko tresnak bihurtu direla. Nik egia errateko ez dut ez sare sozialik ez ezer, ezta nahi ere. Ordenagailua filmaren bat edo musikarentzat erabiltzen dut eta kitto! Aukeran nahiago dut liburu on bat sudurra aintzinean hartu edo eta kalerat atera.

Egoera honen aurrean, borroka da …

Bide bakarra!!!

Liburu baten irakurketa gomendatuko al zeniguke. Zergatik?

Oraintxe bera nire liburutegi ttikia begiratzen eta El cartero de Nerudarekin topo egin dut.

Aspaldi irakurritako liburua dut, baita filma ere ikusia.

Oso liburu txukuna da neretzat eta hunkigarria ere, gainera aski errexa irakurtzekoa baita gutti irakurtzen dutenentzat ere.