Egun hauetan protestak izan dire Zilbetiko
harrobiaren harira.
Hemen duzue Aldude Mendi Koordinakundeak eta Erdiz Bizirikek plazaratu duten idatzia eta horri buruzko berria.
NAFAR MENDIALDEA, AZKEN KOLONIA
ERROIBAR ETA BAZTAN, HARROBIEN ZULOAN
Erroibar
zein Baztanek hiru mehatxu larri dituzte egun, euren ingurua eta etorkizuna
kolokan jartzen dituzten mehatxuak. Gure herrietan, eta euren egitura
ekonomiko, sozial eta kulturalean, inongo errorik ez duten enpresek,
ingurugiroa suntsitu nahi dute baliabide ez-berriztagarri bat ustiatzearren.
Mehatxuok azken hamarkadetan mendialdearen despopulatze eta txirotzea sustatu
duen Nafar Gobernuaren babes eta onespenarekin egiten ari dira.
Mehatxu
hauetariko bat Zilbetin egin nahi den harrobia da, europar legediak babestutako
pagadi ederrean, Magnesitas de Navarra enpresak bultzatu duen proiektua.
Proiektua auzitegian dago SEO.Birdlife-k eta Monte Alduide Koordinadorak
aurkeztutako helegiteen onarpenaren ostean.
Abenduak 24ean Zilbetiko Kontzejuak bizilagunei Magna
enpresak hurrengo hamar egunetan burutuko zituen ekintzen berri eman zien:
zuhaitzak bota, pistak eraiki eta 800 tona material atera. Baimenak dituztela
erran badute ere ez dituzte erakutsi eskatu zaizkienean.
Bertze bi mehatxuak beste bi harrobi dira: bata
Erdizekoa, Baztanen (belardi komunala), hau ere Magnak bultzatuta, eta bertzea
silizea eskuratzeko Auzperrin. Hirurak Red Natura 2000 sareko ZEC berean
kokatzen dira, europar babespen bereziko eremuan.
Gaur
eta hemen Monte Alduide Koordinadorak, eta Erdiz Bizirik Plataformak ekintza hauek guztiak salatu nahi ditugu,
proiektu hauek gure sare ekonomiko eta sozialaren suntsiketa bultzatuko dutela
uste baitugu. Hemendik aitzina bat eginen dugu, suntsiketa ero hau
geldiarazteko, eta baliabideen ustiapen jasangarri, partehartzaile eta
arrazionalean oinarrituta, gure bailarendako etorkizuna eraikitzeko.
Orain bi urte herrietako ordezkariei horrela solastu
zitzaien orduko Nafar lehendakaria zen Miguel Sanz: “ honetan parte
hartzen ez baduzue, ez duzue ezer
edukiko”. Erroibarko ordezkariek burua makurtu egin zuten. Eta irudi duenez,
gauzek aldatzeko itxura handirik ez dute.
Harrobiak agortuko dira eta enpresen interesak mugitu
eginen dira. Ordainetan geldituko zaiguna inguruari kalte itzulezina eta gure
egitura ekonomiko eta sozialaren eztanda izanen da.
Enpleguaren garrantzia azpimarratzen digutenak, lan
erreforma gogor eta zitalak onartu, zerbitzu publikoak ezabatu, eta diru
publikoa interes pribatu ustelduen menpean jartzen duten berberak dira. Munduan
krisia dago, euren garapen ereduaren mugak begi-bistan utziz, eta gurean ere
eragina du. Gure bailarak, mendialdeko bertzeak bezala, baztertuak izan dira utzikeria lotsagabe eta sistematikoan Nafar
Gobernuaren zentralismoagatik. Orain “enplegua” mantratzat harturik, nahi
dutena egiteko erabiltzen dute, baita
gure altxorrik ederrena suntsitzeko ere, gure ingurugiro paregabea. Posible
litzateke enplegua bertze arloetan sustatzea baino horrek ez lieke etekinik
ekarriko eta ez dute hartarako asmorik erakutsi. Lehen sektorea ere indarberritu egin behar da, bere garrantzi
estategikoa eusteko.
Nafar Gobernuak arduragabetasun osoz jokatu du. Proiektu
hauek Red Natura 2000–ren kontrakoak dira, eta erasoa sostengatzen ari dira.
Zera exijitzen diogu: gure bailaren garapen arrazionala, aspalditik zor
zaiguna, biztanleriarekiko behar den begirunea eta proiektu ilegal hauen
erabateko baztertzea. Jakin badakigu ez dietela gure eskaerei erantzungo, eta
euren baztertze politika eta suntsiketa proiektuekin jarraituko dutela.
Horregatik antolatzen jarraituko dugu, gizarte eztabaida sustatuz eta era
guztietako alternatibak eraikiz, euren arduragabetasuna salatzeari utzi gabe.
Egungo egoera ekonomiko eta sozialarekiko
alternatibarik bada eta horren alde lan eginen dugu.
Zilbeti, 2011ko
abenduaren 30ean.