ZAHAR ETXEKO GESTIO PRIBATIZATUA MANTENTZEKO BAZTANGO ZAHAR ETXEKO PATRONATUAK HARTUTAKO ERABAKIAREN HARIRA LABek PRENTSA OHARRA ATERA DU

Halaxe dio oharrak:

Langile bezala eta Komitean LABeko ordezkari bezala Baztango Francisco Joaquin Iriarte Zahar-Etxean, Baztandar guztiei helarazi nahi diegu gure hausnarketa, Idea Innovación enpresa pribatuari kontratua luzatzeko Zahar-Etxeko patronatuak hartutako erabakiaren harira.

Hasteko argi utzi nahi dugu LABeko ordezkariak garenok Zahar-Etxerako gestio publiko baten aldekoak garela, bere sorreratik honat, orain 150 urte Baztango jendarteari eman zaion zerbitzu publiko eta irekia izan den heinean.

Ez dugu aipatu gabe utzi nahi, ez gaudela inolaz ere ados (bere garaian 2009an zerbitzua pribatizatu zenean adierazi genuen bezala), ez pribatizazio nola egin zen, ezta pribatizazio horrek ekarri dituen ondorioekin. Inoiz ez dugu deus izan Idea Innovación enpresaren kontra, baino adjudikazio hori gaur egunean inolako konkurtso publikoren frogarik egon gabe egin zen, pribatuan eta gordeka, eta noski orduko udaletxeko kide zirenen, Patronatuko kide zirenen eta Idea Innovación enpresaren parte hartzearekin bakarrik.


Zahar-Etxearen gestioa pribatizatu eta 5 urtetara, lan harremanak txartu egin dira nabarmen, eta zoritxarrez gestio pribatuak atzerapausoak ekarri ditu lan eskubideetan (4 urte soldata izoztuarekin, soldata jaisteko mehatxuak, paga extren prorrateoa abisatu gabe...)

Ez dugu inolaz ere ulertzen nola Patronatuak bere erabakiarekin ontzat eman duen pribatizazio prozesu bat argi baino puntu beltza gehiago dituena. Deusetarako ere ez du kontuan eduki ez Udaletxearen iritzia, ezta langileen iritzia ere eta orokorrean kontratuaren berritzearen kontra zegoen inoren iritzirik.

LAB beti izan da kritikoa Patronatuak egindako lana eta gestioarekin, Patronatuak berak urteetan egindako gestio negargarri baten ondorioz hartu zuelako aurreko udalak gestioa pribatizatzeko erabakia, beraien hitzen arabera egoera 2099an jasangaitza zen eta.

Garai haietan Patronatuko kideek behin eta berriz errepikatu ziguten, nahiz eta gestioa pribatizatu beraien atzean egonen zirela enpresak egiten zuena begiratzeko. Baino urte guzti hauetan ikusi duguna izan da, enpresa eta langileen artean gatazka bat egon den aldi oro Patronatuaren erantzuna izan dela “lan harremanak gestionatu behar dituena enpresa da ez Patronatua, guk ezin dugu deus egin”. Orduan zertarako nahi dugu Patronatu bat edozein arazoren aintzinean enpresa pribatura bideratzen bagaituzte?

Usai txarra hartzen diogu Patronatu honek enpresarekin izan dezakeen interesari, baino espero duguna da hartutako erabaki honek Baztango Zahar-Etxeko langileen lan baldintzetan eta agureei ematen diogun zerbitzuan ondorio txarrik ez edukitzea