Konpromiso ttikietatik erronka handietara

Arras Baztan Fundazioak  (zeinean Baztango 60 eragile ekonomiko baino gehiago biltzen diren, direla ekoizleak, artisauak, merkatariak, zerbitzuak, ostalariak, alojamendu turistikoak ….), konpromiso ttikien kanpaina aurkeztu berri du, eguneroko hautu kontzientearen bidez tokiko ekonomia indartzea helburu hartuta.

Horretarako, bortz arlotako ekintza zehatzak pentsatu dituzte, hondakinak, energia, ura, elikadura eta euskararen inguruan, hain zuzen. Hauexek lirateke pentsatuak dituzten ekintza zehatzak:

• Hondakinetan, organikoa bereizteko konpromisoa hartzea eta horren enbaxadore izatea.
• Energian, norberaren lantegian LED argiak paratzea eta ahal dela berrerabilgarriak izatea.
• Urari dagokionez, bakoitzaren jardueratik plastikozko ur-botilak kentzea edo ostatuen eta saltokien kasuan, plastikozkoak baztertu gabe kristalezkoak ere eskaintzea. 
• Elikaduran Baztango esnea erabiltzen duten markak kontsumitzea (Jauregia, Kaiku eta Lacturale). 
• Euskara arloan, ordainagiri, faktura eta tiketak euskaraz ere egotea.

Arras Baztanetik aipatu dutenez, “konpromiso ttikien kanpaina eginahal handi baten hasiera bertzerik ez da”. Aipatutako neurriak betetzen dituztela neurtzeko parte hartzaileek konpromiso-agiria sinatu beharko dute eta ondotik Arras Baztan fundazioko patronatuak begirale eta ikuskatzaile lanak eginen dituzte: "erraten dugun hori betetzen dugula bermatzeko eta betetzen ez delarik zergatik betetzen ez den esplikatu ahal izateko".

Beraz, konpromiso txikiak hartzeko deia egiten zaie herritarrei, bakoitzak bere esparrutik konpromiso txikiak har ditzan eta konpromiso txiki horien bitartez erronka handiak lor daitezkeelakoan.

Erronka handiak zati txikitan hartu behar izaten dira, apurka-apurka gure asmoak betetzen joateko. Erronka handiak erronka txikitan zatituta, errazago gaindituko ditugu, batera arituz.