Europako hauteskundeen
baitan EH Bilduk landa eremuei eta Europari buruzko solasaldia eman zuen atzo
Elizondon. Juanma Intxaurrandieta ekonomilaria eta Maiorga Ramirez parlamentaria
Arizkunenearat hurbildutakoen aitzinean mintzatu ziren. Hala, Intxaurrandietak
landa eremuak eta Europa gaia lantzerakoan, nekazal politikarako aurrekontuek
Europako Batasuneko aurrekontuaren erdia direla jakinarazi zuen eta jende
gehienen ustearen aurka, Estatuek eta erkidegoek nekazal politiketan eta landa
garapen programetan zer erran handiagoa dutela. Horrela, gurean,
Madril eta Iruñea mendialdeko nekazariek eta herritarrek jasaten dituzten
politika eta programa hertsatzaileen arduradun dira. Intxaurrandietak erran
zuenez joan den abenduan ondoko zazpi urteetarako Europako nekazal politika
berria onartu zen, zeinean, landa garapenak zati bat osatzen baituen. Politika
horren baitan Nafarroak 173 milioi kudeatuko ditu. Modu horretan, Nekazal
politiketan bai Europan baita Estatuan ere lobbyek duten eragina salatu zuen. Espainiako
estatuan adibidez nekazaritzako ministro berria Certiberiako goi-zuzendaria
izan da.
Maiorga Ramirezek
bertzalde, Europako hauteskundeek duten garrantzia azpimarratu zuen. Langileek
eta herritarrek jasaten dituzten gisa guztietako mozketak Troika deiturikoaren
(NDF, Europako Batzordea eta Europako Banku Zentrala) ardura dira. Baina
politika antisozial horietan ere bertako agintariek, Estatuko eta Nafarroako
agintariek, parte handia dute. PPk eta PSOEek krisiaren kudeaketan duten ardura
salatzeaz gain, Maiatzaren 25ean nafarrei Nafarroako etorkizunaz galdegiteko
hautestontzia ez egotearen ardura egotzi zien. Bertzalde, Euskal Herriak
Europan ahotsa edukitzea defendatu zuen eta bertze eredu eta sozial bat
aldarrikatu ere bai. Modu horretan EAJak Europak murriztailearekin bat egiten
duela salatu zuen.