BAZTANGO UDAL HAUTETSIAK KATALUNIAKO ERREFERENDUMA BABESTEKO UDALBILTZAREN ORDEZKARITZAN EGONEN DIRA

Data:
Urriaren 1eko Kataluniako erreferenduma ikuskatzeko Udalbiltzak antolatu duen nazioarteko bisitarien ordezkaritzan Joseba Otondo Baztango alkateak eta Mikel Ortega eta Maite Iturre Baztango zinegotziek parte hartuko dute. Joan den astelehenean Udalbiltzak Donostian egindako agerraldian jakinarazi zuenez Euskal Herriko ehun hautetsik igandeko galdeketa ikuskatzeko eta babesteko lanetan parte hartuko dute, horien artean, aipatuko hiru hautetsi baztandarrak. Modu berean Kataluniako Independentziaren Aldeko Udalerrien elkarteak larunbatean Bartzelonan euskal ordezkaritzari eginen dion harreran ere egonen dira Baztango ordezkariak.

Bertzalde atzo egindako ohiko osoko bilkuran Baztango Udalak Kataluniako erreferenduma babesteko eta Espainiako Estatuaren jarrera antidemokratikoa salatzeko mozioa onartu zuen EH Bilduren eta Ezkerraren aldeko 6 bozkekin, UPNren kontrako 3kin eta Geroa Bai eta Auzolaneanen 3 abstentzioekin.


Akitzeko larunbat honetan “Kataluniarekin bat, demokraziarekin bat” lelopean eguerdiko 12:00tan Elizondoko plazan elkarretaratzea eginen da.