2018/01/15

ETXEZ-ETXEKO JANARI BANAKETA ETA ARROPA GARBITZEKO ZERBITZUA PARATU DU MARTXAN UDALAK


Etxez-etxeko  zerbitzua Baztango Udalak ematen duen zerbitzu bat da eta bere eguneroko eginbeharrak aurrera eramateko zailtasunak dituzten pertsonei arreta eskaintzea du helburu.

Zerbitzuak, banakako zenbait zerbitzu eskaintzen ditu, garbitasun pertsonalean laguntza, etxeko garbiketa egiten laguntzea edo janaria prestatzen laguntzea, hau guztia pertsonak bere ingurunean ahal den ondoen txertatzeko, bere autonomia pertsonala handitzeko eta bere bizi-kalitatea hobetzen lortzen saiatzeko helburuarekin.

Baztango Udalak zerbitzu hau 1987tik eskaintzen du. Urte guzti hauetan beharrrak aldatuz joan dira eta eskaintzen diren zerbitzuak handitzeko beharra ikusi dugu. Horregatik, bi zerbitzu berri hauek martxan jartzea erabaki da: etxez-etxeko janari banaketa eta arropa garbitzeko zerbitzua.


Etxez-etxeko janari banaketa

Menpekotasun egoeragatik edo adinagatik, erosketak egiteko eta janaria prestatzeko zailtasuna dituzten pertsonei, eguerdiko otordua prestatua etxera eramanen zaie. Eritasunagatik dieta bereziren bat eraman behar badute ere, egoera bakoitzera egokitutako menuak eskainiko dira. Zerbitzua astelehenetik ortziralera emanen da eta menuaren kostua 5 eurotakoa izanen da.

Arropa Garbitzeko zerbitzua

Lehen aipatutako egoeran dauden pertsonei arropa garbitzeko zerbitzua eskainiko diegu. Beharren arabera, etxetik arropa zikina bildu eta garbia bueltatuko diegu. Hilabetean lau zerbitzu eskainiko dira eta zerbitzuaren kostua 40 eurotakoa izanen da. Beharren arabera, arropa astero edo hamabortzetik behin bilduko da.

 Baldintzak betetzen dituzten pertsonek zerbitzua eskatu edo informazio gehiago nahi badute deitu dezatela Baztango Udalean dagoen Gizarte Zerbitzura eskaera egiteko.