Mendietako
larreen erreketak kontrolpean eta segurtasunarekin egiteko, herrialdeko
suhiltzaleen barnean EPRIFekoen gisako talde berezia sortzeko Nafarroako
Gobernuari eskaria egitea onartu du Baztango Udalak. Atzo egindako ohiko osoko
bilkuran hartu zen erabakia ahobatez, EH Bilduk proposaturik
Mozioan aipatzen
denez 2002. urtean mendietako suak prebenitzeko taldeak (EPRIF gazteleraz)
sortu zituen Espainiako Estatuak. Lehendabiziko eginaldirako lau laguneko
brigada sortu zuten eta Baztanerat ekarri.
Geroztik Malerreka, Bortziriak eta Leitzalderat zabaldu dute brigadaren
lan-eremua, baina hasierako lau laguneko kopurua mantenduz. Azarotik maiatzerat
aritzen dira, sei hilabetez.
EPRIF taldeek
erreketen zuzendaritzaren ardura dute eta erreketa zailetan eta arriskutsuetan
suhiltzaileen, mendizainen eta baserritarren lana antolatzen dute, lagundu
bidenabar. Beren lan-aldia astelehenetik ortziralekoa da eta nahiz eta
erreketak asteburuetan egin badaitezkeen ere, aukera hori arras mugatua da.
Alta, herritarrek erreketak asteburuan egin nahiago dituzte.
Bertzalde
EPRIFeko brigadako kideak urtetik urtera aldatzen dituzte eta gure eskualdea
ezagutu orduko lekutzen; aldiro langile berriak ekarriz. Gainera,
kontratazioak, estatu mailakoak dira eta horrek ere, eskualdea ezagutzea aunitz
zailtzen du.
Guzti horregatik,
mendietako larreen erreketak kontrolpean egiteko sortutako zerbitzuak urtetik
urtera gero eta kexa gehiago ditu. Juan Kruz Iriarte zinegotziak aipatu zuenez
gobernuko arduradunekin behin baino gehiagotan bildu dira gaiaz mintzatzeko
baina orain artio ez da deus aitzinatu. Hortaz, atzo onartutako mozioak
arrangura horri bide eman nahi zion.
Horrela, Nafarroako Gobernuari Nafarroa mailako mendietako suak prebenitzeko
talde berezia sortzeko eskaeraz gain, talde
berri hori behar bezain bertze langilez eta baliabidez osatzeko eskaria egiten
da.